ЛОНДОН, 2 сентябрь. /“Дунё” АА/. Тошкентдаги Халқаро Вестминстер университети битирувчиси Муштарий Мадраҳимова Британ Кенгаши томонидан ушбу мамлакат университетлари битирувчилари учун таъсис этилган мукофотнинг “Ижтимоий ҳаракатлар” номинацияси бўйича шорт-листига киритилди, деб хабар бермоқда “Дунё”АА мухбири.

Ушбу халқаро мукофот ўз касби, жамият ва мамлакат ривожига салмоқли ҳисса қўшган Британия университетларининг хорижий битирувчиларига алоҳида ютуқлари учун берилади. Бу йил ватандошимиз тўртта номинация бўйича бутун дунёдан саралаб олинган 28 нафар финалчи орасидан ўрин олди.

Муштарий Мадраҳимова 2010 йилда Тошкентдаги Халқаро Вестминстер университетини “Тижорат ҳуқуқи” мутахассислиги бўйича тамомлаган, шунингдек, Оксфорд университетининг Блаватник номидаги Давлат бошқаруви мактабида давлат сиёсати соҳасида магистрлик даражасини олган.

Ўтган фаолият йилларида у ҳуқуқ ва давлат бошқаруви соҳасида юқори малакали мутахассис сифатида ўзини кўрсатди, аҳолининг одил судловга кириш имкониятларини кенгайтириш, ҳалоллик тамойилларини мустаҳкамлаш ва Ўзбекистонда жамоатчилик ташаббусларини ривожлантиришга фаол кўмаклашди.

У фаол иштирок этган энг муҳим лойиҳалардан бири бутун мамлакат бўйлаб, айниқса чекка ва қишлоқ ҳудудлари аҳолисидан иборат 4 миллиондан ортиқ инсон фойдаланган “Madad” бепул юридик ёрдам кўрсатиш умуммиллий тизимининг ташкил этилиши бўлди.

Муштарий Мадраҳимова ёшларни қўллаб-қувватлашга, жумладан, Ўзбекистоннинг чекка ҳудудларидан келган ёшларга устозлик қилишга, уларни сифатли таълим олишга, жамоат ҳаётида иштирок этишга ва ўз салоҳиятини рўёбга чиқаришга ундашга алоҳида эътибор қаратмоқда.

Вестминстер университетида унинг БМТ Барқарор ривожланиш мақсадларини илгари суришга қўшган салмоқли ҳиссаси эътироф этилди. Унинг касбий йўли таълим ва масъулиятли етакчилик ижобий ижтимоий ўзгаришларга қандай ҳисса қўшиши мумкинлигининг ёрқин намунасидир.