ЛОНДОН, 16 август. /"Дунё" АА/. Ўзбекистон элчиси Равшан Усманов Британиянинг "Teens in AI" компаниясининг асосчиси ва бош ижрочи директори Елена Синель билан учрашув ўтказди, деб хабар қилмоқда "Дунё" АА мухбири.

2018 йилда ташкил этилган "Teens in AI" лойиҳаси ёшларнинг сунъий интеллект (AI) ва технологиялар соҳасида билим ҳамда кўникмаларини ошириш, уларни илм-фан ва технологияларга қизиқтириш, инновацион салоҳиятини ривожлантириш, шунингдек, ижодкорлик салоҳиятини намоён қилиш йўналишида фаолият олиб боради.

Елена Синель Ўзбекистон фуқароси бўлиб, бир неча йилдан буён Буюк Британияда истиқомат қилиб келяпти. Британиянинг ахборот технологиялари соҳасидаги янгиликлар, таҳлиллар ва тенденцияларга ихтисослашган етакчи "ComputerWeekly.com" веб-сайти рейтингига кўра, у Буюк Британиянинг технологиялар соҳасидаги мутахассисларнинг "Топ-50" рўйхатига кирган.

Суҳбат давомида "Teens in AI" билан истиқболда Ўзбекистонда қўшма лойиҳаларни амалга ошириш масалалари муҳокама қилинди.

"Таклиф этаётган лойиҳалар ва ўқув курслари ёшларнинг илм-фан ва технологияларга бўлган қизиқишини оширишга хизмат қилади. Уларни ижтимоий масъулиятни ҳис қилишга ва сунъий интеллектни инсониятга фойдали йўллар билан қўллашга йўналтиради", деди Елена Синель.

Қайд этилишича, ҳозирги кунга қадар "Teens in AI" мутахассислари томонидан дунёнинг 60 дан зиёд мамлакатида 15 мингдан ортиқ ёшларни қамраб олган сунъий интеллект ва технологиялар бўйича лойиҳалар амалга оширилган.

Хорижий компаниянинг Ўзбекистон билан яқин ҳамкорлик алоқаларини ўрнатишдан манфаатдор экани қайд этилди.

Учрашув якунида Ўзбекистон ёшларининг сунъий интеллект ва технологиялар соҳасида билим ва кўникмаларини ошириш бўйича қўшма лойиҳаларни амалга оширишга келишиб олинди.