ЛОНДОН, 11 июль. /"Дунё" АА/. Ўзбекистон элчиси Равшан Усманов Британиянинг Уэльс маъмурий ҳудуди пойтахти Кардифф шаҳри мэри Адриан Робсон билан музокара ўтказди, деб хабар қилмоқда "Дунё" АА мухбири.

Кардифф шаҳри мэри Адриан Робсон мулоқот аввалида Ўзбекистонда ҳар жабҳада кечаётган янгиланишлар, жумладан, очиқ, прагматик ва фаол ташқи сиёсат курси, иқтисодиёт ва ташқи савдони либераллаштириш, инфратузилмани модернизация қилиш, таълим тизимини тубдан ўзгартириш борасида олиб борилаётган саъй-ҳаракатларни юқори баҳолади.

Шу йилнинг 5-17 июнь кунлари Британия шаҳарлари бўйлаб ташкил этилган "Ўзбекистон карвони" Кардифф шаҳрида ҳам байрамона кайфиятда кутиб олингани таъкидланди.

Суҳбат давомида қайта тикланувчи энергия, қишлоқ хўжалиги, IT, туризм ва меҳнат миграцияси соҳаларида кенг кўламли ҳамкорлик истиқболлари муҳокама қилинди.

Учрашув якунида юқорида кўрсатилган йўналишлар бўйича аниқ лойиҳаларни ишлаб чиқиш бўйича келишувга эришилди.

Уэльс Буюк Британия таркибидаги тўртта маъмурий-сиёсий ҳудудлардан бири бўлиб, унда 3,1 миллион аҳоли истиқомат қилади. Ҳудуднинг ялпи ички маҳсулоти (ЯИМ) ҳажми 115,7 миллиард долларни ташкил этади. Иқтисодиёт, асосан, хизмат кўрсатиш соҳаси, туризм, қишлоқ хўжалиги ва саноатга таянади. Шунингдек, Уэльсда қайта тикланувчи энергия манбалари, жумладан, шамол ва сув энергетикаси муҳим аҳамиятга эга. Қишлоқ хўжалигида эса чорвачилик ва сут маҳсулотлари етакчи йўналишлар ҳисобланади.

Кардифф шаҳри ҳудуднинг асосий иқтисодий маркази сифатида ажралиб туради. Уэльс сўнгги йилларда Буюк Британиянинг кўплаб минтақаларига нисбатан юқори иқтисодий ўсиш суръатлари ва нисбатан барқарор фаровонликни сақлаб келмоқда.