ФАРҒОНА, 6 октябрь. /“Дунё” АА/. Фарғона вилояти ҳокими Хайрулло Бозоров Германиянинг Тюрингия федерал ўлкаси иқтисодий ривожланиш агентлиги “Landesentwicklungsgesellschaft Thringen mbH” қошидаги халқаро алоқалар ташкилотининг лойиҳа раҳбари Тюрингия федерал ўлкасидан ташриф буюрган Ирина Хесс бошчилигидаги делегацияни қабул қилди, деб хабар бермоқда “Дунё” АА мухбири.

Учрашувда Фарғона вилояти ва Тюрингия федерал ўлкаси ўртасида шаклланган ҳамкорликнинг бугунги ҳолати, уни янги амалий мазмун билан бойитиш ҳамда иқтисодий ва инвестициявий алоқаларни янада кенгайтириш истиқболлари муҳокама қилинди.

Томонлар сўнгги йиллардаги мунтазам ташрифлар, ҳудудлар, компаниялар ва ишбилармон доиралар ўртасида йўлга қўйилаётган бевосита мулоқотлар икки томонлама муносабатларнинг амалий асосларини мустаҳкамлаётганини алоҳида қайд этди.

Бундай алоқалар нафақат янги бизнес имкониятларини очиш, балки ўзаро тажриба алмашиш ва узоқ муддатли шериклик муносабатларини шакллантириш учун ҳам муҳим аҳамият касб этаётгани таъкидланди.

Музокаралар чоғида истиқболли соҳаларда ҳамкорликни кенгайтириш, янги инвестиция лойиҳаларини ишлаб чиқиш ва амалга ошириш, Фарғона вилояти корхоналари билан Тюрингия компаниялари ўртасида тўғридан-тўғри ишбилармонлик алоқаларини йўлга қўйиш масалалари юзасидан атрофлича фикр алмашилди.

Немис делегацияси вилоятнинг иқтисодий салоҳияти ва тадбиркорлик имкониятларига юқори қизиқиш билдириб, ҳудуд билан ҳамкорликни янада кенгайтиришга тайёр эканини маълум қилди.

Шу муносабат билан келгусида Тюрингия делегациясининг Фарғона вилоятига ташрифини ташкил этиш, маҳаллий тадбиркорлар билан бевосита учрашувлар ўтказиш ва ўзаро манфаатли янги қўшма лойиҳаларни шакллантириш бўйича таклифлар билдирилди.

Учрашув якунида ўзаро ташрифларни фаоллаштириш, ишбилармон доиралар ўртасидаги тўғридан-тўғри мулоқотларни кенгайтириш, мавжуд алоқаларни янги ташаббус ва лойиҳалар билан бойитиш ҳамда вилоят ва федерал ўлка ўртасидаги ҳамкорликни аниқ амалий натижаларга йўналтириш бўйича келишиб олинди.