АЛ-КУВАЙТ, 28 апрель. /"Дунё" АА/. Кувайтда бўлиб турган Фарғона вилояти ҳокими Хайрулло Бозоров кеча "Marafie Group" холдингининг "AL-TIJARIA – The Commercial real estate co" компанияси раҳбарияти ҳамда ОАВ вакиллари билан учрашди, деб хабар бермоқда "Дунё" АА мухбири.

Мулоқот чоғида "AL-TIJARIA – The Commercial real estate co" компанияси вакиллари турли соҳаларда амалга оширилаётган инвестициявий лойиҳаларга сармоялар киритишга тайёрлигини билдирди.

Хусусан, Ўзбекистоннинг катта ер майдонида олма етиштириш плантациясини барпо этиш, ёнида эса олма табиий шарбатларини ишлаб чиқарувчи завод қуриш ва тайёр маҳсулотларни хорижий давлатларга, хусусан Кувайтга экспортини йўлга қўйиш режа қилинаётгани маълум қилинди.

Учрашув якунида савдо-иқтисодий ва инвестициявий ҳамкорлик алоқаларини кенгайтиришга доир масалалар муҳокама қилиниб, Кувайт тадбиркорлари Фарғона вилоятига таклиф этилди.

Бундан ташқари учрашувга ташриф буюрган "Q8 Press" электрон нашри, "ал-Рай" газетаси ҳамда "Times Kuwait" газетаси вакилларининг Фарғона вилоятидаги савдо-иқтисодий ва инвестициявий муҳит юзасидан берилган саволларига тегишли жавоблар берилди.