БЕРЛИН, 20 октябрь. /“Дунё” АА/. Ўзбекистон Коррупцияга қарши курашиш агентлиги директори ўринбосари Умида Тухташева бошчилигидаги делегация Германияда қатор учрашувларда қатнашди, деб хабар беради “Дунё” АА мухбири.

Сафар Европа Иттифоқи ва Германия ҳукумати томонидан молиялаштирилаётган техник кўмак лойиҳаси доирасида Германия халқаро ҳамкорлик жамияти (GIZ) билан ҳамкорликда ташкил этилди.

Мамлакатимиз делегацияси Германия Федерал ички ишлар ва адлия вазирликлари, Савдо-саноат палатаси, Бундестаг ҳамда Берлин прокуратураси вакиллари билан учрашди.

Музокараларда коррупциянинг олдини олиш, ички назорат ва комплаенс тизимларини такомиллаштириш, коррупциявий хавф-хатарларни баҳолаш, манфаатлар тўқнашувини бошқариш ва хабар берувчи шахсларни ҳимоя қилиш масалалари муҳокама қилинди.

Ўзбекистонда рақамли комплаенсни ривожлантириш, хавф-хатарларни баҳолашнинг янги механизмларини жорий этиш ва жамоатчилик назоратини кучайтириш борасидаги ишлар тақдим этилди.

Германиянинг профилактик маслаҳатлар бериш ҳамда хабар берувчиларнинг шахсини ошкор этмасдан, мустақил адвокатлар орқали мурожаатларни қабул қилиш амалиёти юзасидан фикр алмашилди.

Учрашувлар чоғида Германия Федерал ички ишлар вазирлиги билан коррупциянинг олдини олиш ва хавф-хатарларни баҳолаш бўйича тажриба алмашишни давом эттириш, Берлин прокуратураси билан эса профилактик механизмларга оид амалий материаллар алмашишга келишилди.

Шунингдек, Германия халқаро ҳуқуқий ҳамкорлик жамғармаси (IRZ) билан экспертлик ҳамкорлигини тизимли йўлга қўйиш мақсадида ҳамкорлик битимини имзолаш бўйича келишувга эришилди.

Мазкур хизмат сафари коррупциянинг олдини олишнинг таъсирчан механизмларини жорий этиш ва икки мамлакат ўртасидаги институционал ҳамкорликни янада мустаҳкамлашга хизмат қилади.