КУАЛА-ЛУМПУР, 18 июнь. /“Дунё” АА/. Малайзия қишлоқ хўжалиги ва озиқ-овқат хавфсизлиги вазири Муҳаммад Сабунинг Ўзбекистонга расмий ташрифи доирасида икки мамлакат ўртасида қишлоқ хўжалиги соҳасидагистратегик ҳамкорликни кенгайтириш бўйича келишувга эришилди, деб хабар бермоқда “Дунё” АА мухбири. Малайзиянинг “The Star” нашрига таяниб.

Мақолада таъкидланишича, ушбу келишувларга Тошкентда Муҳаммад Сабу ва Ўзбекистон қишлоқ хўжалиги вазири Иброҳим Абдураҳмонов ўртасида бўлиб ўтган икки томонлама учрашув чоғида эришилди.

Томонлар аквамаданият, барқарор суғориш технологиялари, илмий-тадқиқот ва тажриба-конструкторлик ишлари, шунингдек, қишлоқ хўжалиги самарадорлигини ошириш учун “ақлли” технологияларни жорий этиш каби йўналишларда ҳамкорликни ривожлантириш масалаларини муҳокама қилди.

Хабарда ёзилишича, 2025 йилнинг январь–декабрь ойларида Малайзия ва Ўзбекистон ўртасидаги қишлоқ хўжалиги ва озиқ-овқат маҳсулотлари савдоси ҳажми 338,5 миллион Малайзия ринггитини (84,6 миллион АҚШ доллари) ташкил этган. Экспорт таркибида кофе, какао, чой, зираворлар ва қайта ишланган озиқ-овқат маҳсулотлари устунлик қилган бўлса, импорт асосан юқори сифатли мевалар — майиз ва гилосдан иборат бўлган.

Муҳаммад Сабу Малайзиянинг аквамаданият, денгиз маҳсулотлари ишлаб чиқариш ва сифатни назорат қилиш тизимлари, жумладан, қисқичбақачилик соҳасидаги тажрибасини ўртоқлашишга тайёрлигини билдирди ҳамда Ўзбекистон балиқчилигида “биофлок” технологиясини қўллаш имконияти мавжудлигини қайд этди.

Ўзбекистон томони балиқчилик тармоғини ривожлантириш ва озиқ-овқат хавфсизлигини мустаҳкамлаш учун Малайзиянинг илғор тажрибаси, технологиялари ва сармояларини жалб этишдан манфаатдор эканини билдирди.

Томонлар илмий соҳада ўзаро англашув меморандумини тайёрлашни якунлаш мақсадида Малайзия қишлоқ хўжалиги тадқиқотлари ва ишланмалари институти ҳамда Ўзбекистон Қишлоқ хўжалигида билим ва инновациялар миллий маркази ўртасидаги музокараларни давом эттиришни қўллаб-қувватлади.

Малайзия томони Ўзбекистон делегациясини жорий йилнинг 28 августидан 6 сентябрига қадар бўлиб ўтадиган “Малайзия қишлоқ хўжалиги, боғдорчилик ва агротуризми” (MAHA–2026) халқаро кўргазмасида иштирок этишга таклиф қилди.

Ташриф доирасида “Meraque Group” компаниясининг Ўзбекистондаги фаолиятини расман йўлга қўйиш маросими ҳам бўлиб ўтди.