СЕУЛ, 19 апрель. /Дунё" АА/. Мамлакатимизнинг Жанубий Кореядаги элчихонаси ташаббуси ва Сирдарё вилояти ҳокимлиги таклифига биноан, Кванжу шаҳри Квансан-гу тумани ҳокими Пак Бюн Кю бошчилигидаги делегация жорий йилнинг 19-23 апрель кунлари хизмат сафари билан Ўзбекистонда бўлади, деб хабар бермоқда "Дунё" АА мухбири.

Делегация таркибига Квансан-гу тумани ҳокимлиги расмийлари, депутатлари, "Корея˗Ўзбекистон" бизнес ассоциацияси бошлиғи, университетлари президентлари, етакчи компания ва ташкилотлари раҳбарлари киритилган.

Ташриф кун тартибидан Гулистон шаҳрида икки ҳудуд тадбиркорлари иштирокида бизнес-форум ва B2B/B2G шаклидаги учрашувлар ўтказиш, ҳудудлараро ҳамкорлик меморандумини имзолаш, амалга оширилаётган йирик иқтисодий лойиҳалар билан танишув, "Сирдарё" ЭИЗга ташриф буюриш ва хайрия тадбирларини амалга ошириш ўрин олган.

Бундан ташқари, Олий таълим, фан ва инновациялар вазирлиги, Корейс маданият марказлари уюшмаси, Алишер Навоий номидаги Тошкент давлат ўзбек тили ва адабиёти, "Ипак йўли" туризм ва маданий мерос ҳамда Гулистон давлат университетларида учрашувлар ўтказиш ва тегишли ҳамкорлик ҳужжатларини имзолаш режалаштирилган.