БЕРЛИН, 11 октябрь. /“Дунё” АА/. Ўзбекистон элчиси Дилшод Аҳатов Германия Федерал қишлоқ хўжалиги ва озиқ-овқат вазирлиги парламент статс-котиби Мартина Энгльхардт-Копф билан учрашув ўтказди, деб хабар бермоқда “Дунё” АА мухбири.

Томонлар қишлоқ хўжалиги ишлаб чиқаришини модернизация қилиш, немис ускуналари ва илғор технологияларини жорий этиш, чорвачилик соҳасидаги инновацион ечимлар ҳамда чорва молларини рақамли идентификация қилиш тизимларини муҳокама қилдилар.

Учрашувда агросаноат корхоналари ва илмий-тадқиқот институтлари ўртасидаги ҳамкорликни йўлга қўйиш, мутахассислар ўртасида тажриба алмашиш ҳамда қўшма инвестиция лойиҳаларини амалга ошириш масалаларига алоҳида эътибор қаратилди.

Шунингдек, немис делегациясининг Ўзбекистонга режалаштирилган ташрифи доирасида Германиянинг етакчи агросаноат компаниялари ва соҳавий бирлашмалари билан ҳамкорлик истиқболлари кўриб чиқилди.

Мазкур мулоқот Ўзбекистон аграр секторига илғор немис технологияларини олиб кириш ҳамда қўшма илмий-амалий лойиҳаларни ривожлантиришга хизмат қилади.