ВАШИНГТОН, 2 октябрь. /“Дунё” АА/. АҚШ пойтахтида илк бор Транспорт ва логистика масалаларига бағишланган Ўзбек-америка форуми ташкил этилди, деб хабар бермоқда “Дунё” АА мухбири.

Тадбир Ўзбекистоннинг АҚШдаги элчихонаси ва “IT Park Uzbekistan” ҳамкорлигида ўтказилди. Форумда Америкада фаолият юритаётган ватандошларимиз томонидан таъсис этилган 70 дан ортиқ транспорт, логистика, трекинг, диспетчерлик ва BPO-компаниялар раҳбарлари иштирок этдилар.

Тадбир аввалида «IT Park Uzbekistan» резидент компаниялари умумий экспортининг 54 фоизи АҚШ бозорига тўғри келиши таъкидланди. Айни пайтда “IT Park”нинг 550 дан ортиқ резиденти Америка компанияларига хизмат кўрсатиб, 16 мингдан зиёд мутахассиснинг бандлигини таъминламоқда. 2025 йилда АҚШга хизматлар экспорт ҳажми 320 миллион долларни ташкил этган.

Анжуманда АҚШдаги ўзбек тадбиркорлари томонидан яратилган транспорт компаниялари катта амалий тажриба ва юқори иқтисодий салоҳият тўплагани қайд этилди. Шу боис, уларнинг салоҳиятини Ўзбекистонда янги иш ўринларини яратиш, бошқарув ва логистиканинг замонавий ёндашувларини жорий этиш, BPO-хизматларни ривожлантириш ҳамда инвестицияларни жалб этишга йўналтириш муҳимлиги кўрсатиб ўтилди.

Хусусан, АҚШ компанияларининг айрим операцион функцияларини – диспетчерлик хизматлари, кол-марказлар, бэк-офис, бухгалтерия ҳамда IT йўналишларини Ўзбекистонда жойлаштириш имкониятлари тақдим қилинди. Бу Америка компанияларига харажатларни мақбуллаштириш, Ўзбекистонда эса янги иш ўринларини яратиш ва хизматлар экспортини ошириш имконини беради.

Форум доирасида транспорт-компаниялари фаолияти барқарорлигини таъминлаш, замонавий бошқарув амалиётларини жорий этиш ҳамда ҳуқуқий ва операцион хавфларни камайтиришга бағишланган алоҳида интерактив сессиялар ўтказилди. Шунингдек, киберхавфсизликни таъминлаш, ички хавфсизлик чораларини кучайтириш ва ходимларнинг малакасини мунтазам ошириб бориш юзасидан амалий тавсиялар берилди.

Тадбир натижасида АҚШда фаолият юритаётган транспорт ва логистика компанияларини бирлаштирувчи Профессионал ассоциация тузиш ташаббуси илгари сурилди. Бундан ташқари, АҚШ бозорига BPO- ва аутсорсинг хизматлари экспортини кенгайтириш, Америка логистика компанияларининг операцион функцияларини Ўзбекистонга жойлаштириш бўйича қўшма ишчи гуруҳ тузилди.