САМАРҚАНД, 22 сентябрь. /“Дунё” АА/. 46-Бутунжаҳон шахмат олимпиадасининг 6-тур баҳсларида Ўзбекистон-1 терма жамоаси асосий рақибларидан бири бўлган Ҳиндистонни мағлуб этиб, ўз етакчилигини мустаҳкамлади, деб хабар бермоқда “Дунё” АА мухбири.

Ҳиндистонга қарши кечган баҳс шахматчиларимиз учун ҳам, рақиб жамоа учун ҳам юқори руҳий босим остида ўтди.

Мусобақанинг марказий қарама-қаршилигида тўртта тахтада ҳам кучли гроссмейстерлар иштирок этди. Нодирбек Абдусатторов Праггнанандҳа билан, Жавоҳир Синдаров Аржун Эригайиси билан, Шамсиддин Воҳидов эса амалдаги жаҳон чемпиони Гукеш Доммараджу билан дуранг ўйнади.

Шу тариқа, баҳс тақдири тўртинчи тахтадаги Нодирбек Ёқуббоев ва Ниҳал Сарин ўртасидаги ўйинга боғланди. Ҳал қилувчи партияда Ёқуббоев позицион устунликни босқичма-босқич кучайтириб, 38-юришга келиб ғалаба учун қулай вазият яратди. Якунда ҳамюртимиз рақибини таслим этиб, Ўзбекистон-1 жамоасига ҳал қилувчи очкони тақдим этди.

Натижада Ўзбекистон-1 Ҳиндистонни 2,5:1,5 ҳисобида мағлуб этди ва 12 очко билан турнир жадвалидаги етакчилик мавқеини мустаҳкамлади.

6-турдаги яна бир муҳим натижа Ўзбекистон-1нинг асосий таъқибчиларидан бўлган Германия ва Хитой ўртасидаги баҳсда қайд этилди. Унда Хитой терма жамоаси Германияни 3:1 ҳисобида мағлуб этди.

Ҳиндистон устидан қўлга киритилган ғалаба Ўзбекистон-1 учун нафақат навбатдаги икки очко, балки Олимпиададаги етакчиликни сақлаб қолиш нуқтаи назаридан ҳам муҳим аҳамият касб этди. Айниқса, учта тахтада дуранг натижа қайд этилган шароитда тўртинчи тахтадаги Ёқуббоевнинг ғалабаси жамоага ҳал қилувчи устунликни берди.

7-турда Ўзбекистон-1 жамоаси яна бир муҳим рақиби саналган Хитой шахматчиларига қарши дона суради.