ПЕКИН, 23 август. /“Дунё” АА/. Пекин педагогика университетининг Камбағалликка қарши курашиш институти декани Чжан Ци мамлакатимиз мустақиллигининг 35 йиллиги арафасида “Дунё” АА орқали юртдошларимизга ўзининг самимий табриги ва эзгу тилакларини йўллади.

– Ўзбекистон халқини Мустақилликнинг 35 йиллиги муносабати билан институт ҳамда ўзим номимдан самимий қутлаб, алангали салом йўллайман.

Ўтган йиллар давомида Ўзбекистон ижтимоий-иқтисодий ривожланиш, аҳоли турмуш сифатини яхшилаш, айниқса, камбағалликка қарши курашиш бўйича улкан натижаларга эришди. Тадқиқотларимиз натижаларига кўра, Ўзбекистонда камбағаллик даражаси изчил пасайиб бораётганини кўриш мумкин.

Мамлакат халқаро қашшоқликка қарши кураш ва БМТнинг 2030 йилгача бўлган Барқарор ривожланиш кун тартибини амалга оширишга салмоқли ҳисса қўшди. Ўзбекистон тажрибаси камбағалликни самарали қисқартиришнинг ёрқин намунаси бўлди.

Ўзбекистон қашшоқликка қарши курашиш йўналишида илғор халқаро тажрибани ўзлаштирмоқда ва ҳамкорликни фаол ривожлантирмоқда. Хусусан, камбағалликни қисқартириш ва барқарор ривожланиш сиёсати моделини шакллантириш учун Хитой ва бошқа давлатлар билан муносабатларни кенгайтирмоқда.

Сўнгги йилларда Хитой–Ўзбекистон ҳамкорлиги жадал ривожланиб, сезиларли натижалар қўлга киритилди. Давлат даражасида мамлакатларимиз етакчиларининг яқин алоқалари ўзаро ҳамкорликнинг асосий драйвери бўлиб хизмат қилмоқда.

Биз савдо-иқтисодий, транспорт, илмий-техникавий, гуманитар соҳаларда, камбағалликка қарши курашиш йўналишида кенг кўламли қўшма лойиҳаларни амалга оширмоқдамиз.

Ўзбекистон тажрибаси, ютуқлари, мавжуд муаммоларни таҳлил қилиш ва Хитой тажрибаси билан таққослаш натижасида қатор тавсиялар тайёрладик. Улар Ўзбекистон ҳукумати томонидан қабул қилинди ва ижобий самара берди.

Бундан ташқари, институтимиз Ўзбекистон билан барқарор ҳамкорлик алоқаларини ўрнатган. Мутахассисларимиз ўзбекистонлик мутахассислар учун мунтазам равишда тренинглар ташкил этиб келмоқда.

Яқинда ўтказилган хизмат сафари давомида биз Ўзбекистонда қишлоқ хўжалиги инновацияларини жорий этишга бўлган юқори эҳтиёжни кўрдик. Деҳқончилик бўйича тажрибалар, сув тежовчи технологиялар, ихтисослаштирилган ўсимликшунослик ва чорвачилик, ҳимояланган ер, сунъий интеллект, рақамли иқтисодиёт каби лойиҳалар кўпчиликда катта қизиқиш уйғотмоқда.

Шу билан бирга, биз мутахассислар тайёрлаш, олий таълим, умумий ва мажбурий мактаб таълими бўйича ҳамкорликни ривожлантириш учун кўплаб имкониятларга эгамиз. Бу йўналишлар Хитой–Ўзбекистон ҳамкорлиги учун кенг уфқларни очади.

Ўзбекистонга янги тарихий босқич – Мустақилликнинг 35 йиллигида янги ва ёрқин ютуқлар тилайман.