МАДРИД, 20 август. /“Дунё” АА/. Испаниянинг етакчи “El Mundo Financiero” нашрида Ўзбекистондаги кенг кўламли ислоҳотлар ҳамда мамлакат тараққиётида ёшларнинг ўрнига бағишланган мақола эълон қилинди, деб хабар бермоқда “Дунё” АА мухбири.

Нашрда қайд этилишича, Ўзбекистон мустақиллигининг 35 йиллигида замонавий жамиятнинг асосини ташкил этувчи суверен давлат тенгдошлари – “Мустақиллик авлоди” шаклланди. Айнан шу ёшлар бугун мамлакатни йирик IT-экспортёр ва минтақанинг технологик марказига айлантириб, жадал рақамлаштиришнинг асосий локомотивига айланмоқда.

Иқтисодиётнинг кенг кўламли либераллаштирилиши, 90 дан ортиқ мамлакат фуқаролари учун визасиз режимнинг жорий этилиши ва очиқлик сиёсати республиканинг халқаро обрўсини тубдан ўзгартирди.

Муваффақиятли ёш дизайнерлар ва тадбиркорлар туфайли анъанавий ўзбек ҳунармандчилиги жаҳон мода саноати ҳамда креатив иқтисодиётга уйғун равишда интеграциялашмоқда.

Мақолада демократик ўзгаришлар ва очиқлик жамиятнинг ўзидан келиб чиққан табиий талабга айланганига эътибор қаратилади. Замонавий Ўзбекистон бутун Марказий Осиёдаги динамик иқтисодий локомотив ва ишончли барқарорлаштирувчи куч сифатидаги ўрнини дадил мустаҳкамламоқда.