АҚШ пойтахти мэри 1 сентябрни Ўзбекистон Мустақиллиги куни деб эълон қилди
Август 30, 2026. 11:02 • 2 дақ
• 96
ВАШИНГТОН, 30 август. / “Дунё” АА/. Вашингтон мэри Мюриэль Баузер мамлакат мустақиллигининг 35 йиллиги шарафига 2026 йил 1 сентябрни расман “Ўзбекистон Республикаси Мустақиллиги куни” деб эълон қилди, деб хабар бермоқда “Дунё” АА мухбири.
Ушбу қарор нафақат Ўзбекистон мустақиллигининг тарихий аҳамиятини эътироф этиш, балки мустаҳкамланиб бораётган ўзбек-америка муносабатларининг, шунингдек, АҚШ пойтахти ҳаётида ўзбек жамоасининг муҳим ўрни тан олинишининг ёрқин далили бўлди.
Вашингтон мэри ўз декларациясида Ўзбекистон Мустақиллиги кунининг аҳамиятини таъкидлаб, Америка Қўшма Штатлари Ўзбекистон мустақиллигини биринчилардан бўлиб тан олганини қайд этди.
Ҳужжатда, хусусан, “Ўзбекистон ўз мустақиллиги эълон қилинганининг 35 йиллигини нишонламоқда. Ҳар йили 1 сентябрь куни нишонланадиган ушбу сана ўзбек халқининг бой маданий мероси, эришган юксак ютуқлари, шунингдек, Ўзбекистоннинг халқаро ҳамжамиятдаги ортиб бораётган обрў-эътиборини эътироф этиш куни сифатида алоҳида аҳамиятга эга”, - деб қайд этилган.
“Бутун дунёдаги ўзбек жамоалари билан биргаликда Ўзбекистон Мустақиллиги кунини нишонлар эканмиз, халқларимизни бирлаштириб турган мустаҳкам дўстлик, ҳамкорлик ва муштарак эзгу мақсадларни юқори баҳолаймиз, — дейилади ҳужжатда. — Шу муносабат билан 2026 йил 1 сентябрь Вашингтонда (Колумбия округи) “Ўзбекистон Мустақиллиги куни” деб эълон қилинади”.
Telegram каналига обуна бўлинг
Барча янгиликлар ва янгиланишлардан биринчилардан бўлиб хабардор бўлинг!
Сўнгги янгиликлар
Барчаси
Мавзуга оид
Йоахим Фритц: Бугун Ўзбекистон одамларни, ғоялар ва имкониятларни боғлайдиган кўприкка айланмоқда
Нямтайширин Номтойбаяр: Мўғулистон ва Ўзбекистон ўртасидаги шериклик янги босқичга чиқмоқда
