ПРАГА, 31 август. /“Дунё” АА/. Халқаро маслаҳатлашув кенгаш аъзоси, Европада кенгайиш ва Европа қўшничилик сиёсати бўйича собиқ комиссари, чехиялик дипломат Штефан Фюле Ўзбекистон давлат мустақиллигининг 35 йиллиги арафасида “Дунё” АА орқали Ўзбекистон халқига ўзининг самимий табриклари ва энг эзгу тилакларини йўллади:

— Авваламбор, Ўзбекистоннинг барча фуқароларини Мустақилликнинг 35 йиллик байрами билан самимий табриклайман.

Сиз бой тарихий меросингизга таянган ҳолда замонавий давлат барпо этишга эришдингиз. Бир вақтлар сиз машҳур Буюк ипак йўлининг энг муҳим қисми бўлгансиз ва ривожланган давлатчиликка эга эдингиз. Бугун сиз барпо этаётган давлат бой ўтмишингизнинг муносиб ва самарали давомидир. Сиз ўз тарихингиздан илҳом оласиз ва ушбу тажрибани бошқаларга намуна сифатида кўрсата олишингиз билан фахрланишингиз керак.

Сиз нафақат ўз мамлакатингизни, балки бутун минтақани ўзгартирдингиз. Қўшниларингизга бўлган эътиборингиз, бутун минтақадаги яхши ниятли инсонлар билан ҳамкорлик қилишга очиқлигингиз Марказий Осиё мамлакатларини кўплаб умумий муаммоларни биргаликда ҳал этиш йўлида бирлашишга илҳомлантирди.

Сиз ҳар доим ўз фуқароларингизни мамлакатни ривожлантириш жараёнларига жалб этиб келдингиз. Бир неча йил олдин янгиланган Конституция, менинг назаримда, бунинг энг ёрқин мисолидир. У халқ билан мулоқот ва ўзаро ҳамкорлик инновация руҳини шакллантириш ҳамда мамлакат тараққиётига янги суръат бағишлашга қанчалик қодир эканини кўрсатди.

Ўтган 35 йил давомида сиз улкан ютуқларга эришдингиз. Бир неча йил олдин Европа Иттифоқида ким ҳам тасаввур қила оларди: бир томондан Марказий Осиё ва ушбу жараёнда жуда фаол роль ўйнаган Ўзбекистон, иккинчи томондан Европа Иттифоқи ва унга аъзо давлатлар стратегик шерикликни ривожлантиради деб. Сиз бизни бунга илҳомлантирдингиз.

Сиз жуда мураккаб, айтиш мумкинки, марказий минтақада жойлашгансиз, атрофингизда Евроосиё иқтисодий иттифоқи, Европа Иттифоқи, “Бир макон, бир йўл” ташаббуси ва бошқа йирик геосиёсий ҳамда иқтисодий лойиҳалар мавжуд. Бироқ ушбу хавф-хатарлардан чўчиш ўрнига, сиз уларни имкониятларга — ўз давлатингиз ва халқингиз учун янги истиқболларга айлантира олдингиз.

Мустақилликка эришилганидан 35 йил ўтиб, бу бошқалар учун жуда яхши ибрат ва намуна бўлиши керак.

Яна бир бор байрамингиз муборак бўлсин!