ОЛМАОТА, 20 март. /“Дунё” АА/. Олмаота шаҳридаги юртимиз Бош консулхонаси вакиллари хориждаги ватандошларнинг ҳуқуқ ва манфаатларини ҳимоя қилиш масаласига алоҳида эътибор қаратиб келмоқда, деб хабар қилмоқда “Дунё” АА мухбири.

Хусусан, консуллик дипломатлари жорий йил март ойи бошидан бугунга қадар 382 нафар қийин аҳволда қолган фуқарога консуллик-ҳуқуқий, моддий ва амалий ёрдам кўрсатилди. Ушбу ёрдам кўп қиррали бўлиб, турли ҳолатларда юртдошларни қўллаб-қувватлашни ўз ичига олади.

Масалан, вақтинчалик яшаш жойи бўлмаган 27 нафар фуқаро хостелларга жойлаштирилди, молиявий қийин аҳволда қолган 12 нафар юртдошга Ватанга қайтиш учун давлат ҳисобидан авиачипталар тақдим этилди. Шунингдек, виждонсиз иш берувчилар томонидан олиб қўйилган 48 нафар меҳнат муҳожирининг шахсини тасдиқловчи ҳужжатлари, асосан паспортлари, қайтариб олиб берилди. Бу чоралар фуқароларнинг ҳуқуқларини ҳимоя қилиш ва уларнинг хавфсизлигини таъминлашга қаратилган.

Меҳнат фаолияти давомида тиббий ёрдамга муҳтож бўлган 3 нафар фуқаро марказий тиббиёт муассасаларига жойлаштирилди ва уларнинг барча тиббий харажатлари давлат ҳисобидан қоплаб берилди. Бу тадбирлар ўз вақтида амалга оширилгани туфайли юртдошлар соғлиги таъминланиб, уларнинг ҳаёти ва хавфсизлиги ҳимоя қилинди.

Шу билан бирга, консуллик вакиллари дипломатик ваколатхона ҳудудларидаги вақтинчалик сақлаш муассасаларидаги 312 нафар фуқаро билан видеоконференц алоқа орқали мулоқот ўтказди. Ушбу учрашувларда уларнинг мавжуд муаммолари тўлиқ ўрганилди, Ватанга қайтариш учун зарур ҳужжатлар расмийлаштирилди. Бу жараён юртдошлар учун вақтинчалик ёки узоқ муддатли қийин аҳволларда қўллаб-қувватлашнинг муҳим қисми сифатида амалга оширилди.

Меҳнат муҳожирлари учун янада қулай шарт-шароит яратиш мақсадида консулхона вакиллари 4 та хусусий хостел билан ҳамкорлик меморандумлари имзолади ва Ўзбекистон Миграция агентлиги билан биргаликда хизматларни ташкил этиш йўлга қўйилди. Бу ҳамкорлик юртдошларимизни вақтинчалик турар жой билан таъминлаш ва уларнинг хавфсизлигини таъминлашда муҳим аҳамиятга эга.

Консулхона вакиллари шаҳардаги 7 та қурилиш объектига ташриф буюрилиб, 120 нафардан ортиқ меҳнат муҳожири билан учрашди. Уларга хорижда ишлаш давомида риоя этилиши керак бўлган қонунчилик, яратилаётган имкониятлар ва давлат томонидан берилаётган имтиёзлар ҳақида тушунча берилди. Юртдошларга Ўзбекистонда меҳнат муҳожирлари учун яратилаётган қулайликлар, уларнинг оила аъзоларига берилаётган имтиёзлар ва Миграция агентлиги томонидан очилаётган янги имкониятлар ҳақида ҳам маълумотлар берилди.

Дипломатлар томонидан ташкил этилаётган учрашувларда профилактик тушунтириш ишлари ҳам олиб бориляпти. Ватандошларга Қозоғистон миграция қонунчилигига қатъий риоя қилиш, диний ва террористик оқимларга қўшилмаслик ва ушбу ноқонуний ташкилотлар билан алоқада бўлмаслик бўйича тегишли кўрсатмалар берилмоқда. Бундай тадбирлар юртдошларнинг хавфсизлиги ва ҳуқуқий барқарорлигини таъминлашда муҳим аҳамият касб этмоқда.