ВЛАДИВОСТОК, 15 ноябрь. /“Дунё” АА/. Ўзбекистон Бош консулхонаси дипломатлари Владивосток шаҳри мэри вазифасини вақтинча бажарувчи Кирилл Хижинский билан учрашув ўтказди, деб хабар бермоқда “Дунё” АА мухбири.

Учрашувда Ўзбекистон ва Владивосток шаҳри ўртасида олиб борилаётган ўзаро ҳамкорлик алоқаларининг жорий ҳолати, ижтимоий-гуманитар ва туризм йўналишларидаги алоқаларни янада ривожлантириш масалалари муҳокама этилди.

Кирилл Хижинский меҳнат миграцияси соҳасига тўхталиб, Ўзбекистон томони билан яқиндан ҳамкорлик қилиш ва фуқароларни уюшган тарзда ишга жалб этишда амалий ёрдам кўрсатишни сўради.

Ўз навбатида, Бош консулхона дипломатлари учрашув давомида Ўзбекистон Ҳукумати томонидан хорижда меҳнат қилаётган юртдошларимизни ижтимоий, ҳуқуқий ва моддий қўллаб-қувватлаш бўйича амалга оширилаётган ишлар, шунингдек, фуқароларни хорижий давлатларга фақат хавфсиз, уюшган ва қонуний тартибда ишга жойлаштириш механизми тўғрисида батафсил маълумот бердилар.

Музокаралар натижасига кўра, Ўзбекистон фуқароларини ишга қабул қилиш бўйича Владивосток шаҳрининг тегишли ташкилотларидан Бош консулхона номига расмий мурожаат хати юборилиши ҳамда келгусида ушбу йўналишдаги ҳамкорлик муносабатларини янада кенгайтиришга келишиб олинди.