ВАРШАВА, 24 сентябрь. /“Дунё” АА/. Ўзбекистон элчихонаси вакиллари жорий йил август ва сентябрь ойларида Польшада вафот этган икки нафар ҳамюртимизнинг жасадларини ватанга қайтариш учун зарур чораларни кўрди, деб хабар бермоқда “Дунё” АА мухбири.

24 август куни Ольштин шаҳрида баландликдан йиқилиб, оғир бош мия жароҳати олиб вафот этган Ж.Х.нинг жасади 5 сентябрь куни ватанига олиб келинган.

5 сентябрь куни Шецин шаҳрида вафот этган Т.Э.нинг жасади 20 сентябрь куни Тошкентга олиб келинган. Расмий маълумотларга кўра, ўлимга қоқшол сабаб бўлган.

Ҳар икки ҳолатда ҳам жасадларни Польшадан Ўзбекистонга олиб келиш бўйича барча харажатлар Президентимиз ташаббуси билан ташкил этилган Миграция жамғармаси маблағлари ҳисобидан қопланди.

Элчихона Польша органлари билан биргаликда вафот этганларнинг жасадларини ватанга қайтариш жараёнини мувофиқлаштирди. Бундай саъй-ҳаракатлар вафот этганларнинг яқинларига қийин даврда қўшимча ёрдамдир.