ВАРШАВА, 14 март. /"Дунё" АА/. Польшанинг "Podróże" ("Саёҳат") туристик порталида "Афросиёб" тезюрар поездига бағишланган мақола жойлаштирилди, деб хабар бермоқда "Дунё" АА мухбири.

Нашрда муаллиф Ежи Немоцински Ўзбекистонга қилган саёҳати ҳақидаги сўзлаб берган.

"Ўзбекистонда поездлар соатига 230 км тезликда ҳаракатланиши кўпчилик полшаликларни ҳайратда қолдириши мумкин. Агар мен буни ўз бошимдан кечирмаганимда, эҳтимол бунга ишонмаган бўлардим, – деб ёзади у. – Марказий Осиёнинг бепоён даштлари бўйлаб поездда Ўзбекистон ҳудудига борганимда, вагон витринасида биз қандай тезликда – соатига 230 км тезликда кетаётганимизни кўриб ҳайрон бўлганимни бир тасаввур қилинг. Вой-буй! Мен ҳайратдан йиғлаб юбордим".

Журналист саёҳати давомида нафақат мамлакатнинг бетакрор манзаралари, балки ўзи кетаётган поезд ҳам уни ҳайратда қолдирганини урғулаган.

"Маълум бўлишича, Ўзбекистон Марказий Осиёда тезюрар поездлар қатнови йўлга қўйилган ягона давлат бўлиб, бундай коммуникация инфратузилмасига эга дунёдаги 20 та мамлакатдан биридир, – дея давом этади муаллиф. - Польша италияликлардан "Pendolino" тезюрар поездларини, Ўзбекистон эса Испаниянинг "Talgo 250" поездларини харид қилган. Иккала поезднинг ташқи кўринишидаги энг катта фарқ шундаки, италян локомотиви енгилроқ, соддалаштирилган шаклга эга. Бироқ, испан локомотиви эса янада чиройли кўринади".

Журналистнинг ёзишича, айни пайтда Ўзбекистонда иккита тезюрар линия ишламоқда. Иккаласи ҳам Тошкентдан бошланиб, Жиззах орқали Самарқандга боради. Бундан ташқари, Навоий орқали Бухорога, иккинчиси эса Қарши орқали Китобгача чўзилган. Модернизация ва электрлаштириш ишлари якунлангач, Бухоро-Урганч-Хива йўналишида ҳам тезюрар поездлар қатнови йўлга қўйилади, бу эса Тошкентдан Хивагача бўлган йўл вақтини икки баравар – 7 соатга қисқартириши кутилмоқда.

Нашрда маълум қилинишича, айни пайтда Ўзбекистонда 6 та тезюрар поезд ҳаракатланмоқда. Уларнинг ҳар бири 294 йўловчига мўлжалланган 11 та вагондан иборат.

"Афросиёб поездларининг "Pendolino" поездларидан фарқи шундаки, Ўзбекистон поездида ВИП тоифадаги вагонлар мавжуд. Улар қулай чарм ўриндиқлар ва столлар билан жиҳозланган", – дея тасвирлаган у. – Тезюрар поездларда саёҳат қилиш жуда қулайлиги, чипталар нархининг юқори бўлишига қарамай, улар жуда машҳур эканлигини англатади. Баъзан чипталарни олдиндан сотиб олиш ҳам қийинлашади".

Ежи Немоцински ўз хулосасида, Ўзбекистон тезюрар темир йўллари Польшадагига қараганда анча яхши эканини таъкидлаган.