ИСТАНБУЛ, 16 октябрь. /"Дунё" АА/. Ўзбекистон Бош консулхонаси кўмагида 6-10 октябрь кунлари Тошкент шаҳар ҳокими ўринбосари Санжар Тажиев бошчилигидаги делегациянинг Истанбул шаҳрига амалий сафари ташкил этилди, деб хабар қилмоқда "Дунё" АА мухбири.

Ташриф доирасида делегация аъзолари Истанбул шаҳар ҳокимлигинингг Туризм ва Ташқи алоқалар департаментлари раҳбарлари билан учрашувлар ўтказди. Музокаралар чоғида турк томони билан Истанбулнинг гастрономик туризмга ихтисослашган, 7/24 тартибда фаолият юритувчи кўчалари ва туристик объектларга маҳаллий бошқарув органлари томонидан тақдим этилаётган имтиёзлар, шунингдек, уларни ривожлантириш стратегияси юзасидан фикр алмашилди.

Сафар давомида, шунингдек, жамоат тартибини сақлаш ва хавфсизлик чораларини таъминлаш бўйича ҳам Истанбул шаҳар ҳокимияти вакиллари билан музокаралар ўтказилди. 

Ўзбекистон вакиллари ташриф давомида Истанбул шаҳридаги гастрономик туризмга ихтисослашган кўчалар ва бошқа диққатга сазовор жойлар билан танишди.