ТОШКЕНТ, 28 февраль. /“Дунё” АА/. Ўзбекистон пойтахтида Американинг “Traxys Group” компаниясининг Марказий Осиёдаги биринчи минтақавий офисининг расмий очилиш маросими бўлиб ўтди, деб хабар бермоқда “Дунё” АА мухбири.

“Traxys Group” компанияси дунёнинг 20 дан ортиқ мамлакатида ўз фаолиятини юритади ҳамда АҚШ, Европа, Осиё ва Яқин Шарқда ўнлаб халқаро офисларига эга. Унинг йиллик савдо айланмаси тахминан 10 миллиард АҚШ долларини ташкил этади ва уран ва стратегик минералларни етказиб бериш бўйича жаҳон етакчилари қаторига киради.

Қайд этиш жоизки, компания АҚШ ҳукумати учун ишончли минераллар етказиб берувчи сифатида тан олинган ҳамда U.S. International Development Finance Corporation (DFC) ва Export-Import Bank of the United States (EXIM Bank) каби халқаро молиявий институтлар билан яқин ҳамкорлик олиб боради. Бу эса Ўзбекистон учун нафақат барқарор бозор, балки замонавий технологиялар, молиявий ресурслар ва халқаро экспертизани жалб қилиш имкониятини яратади.

Бугунги кунда глобал иқтисодиётда “критик минераллар” тушунчаси янги иқтисодий драйвер сифатида стратегик аҳамият касб этмоқда. Вольфрам, молибден, никель, кобальт, ванадий каби ресурслар энергетика, мудофаа саноати, юқори технологиялар ва “яшил иқтисодиёт” учун ҳал қилувчи омил ҳисобланади.

Ўзбекистон Президентининг қарорига мувофиқ Ўзбекистон технологик металлар комбинати тизимида 70 дан ортиқ йирик инвестиция лойиҳалари амалга оширилмоқда. 2030 йилга бориб стратегик фойдали қазилмалар ишлаб чиқариш ҳажмини 1 миллиард доллардан ошириш кўзда тутилган. Корхонада 2025 йил якуни билан 53 тонна вольфрам ва 950 тонна молибден ишлаб чиқарилган бўлса, 2026-2030 йилларда 16 минг тонна вольфрам ва 5,5 минг тонна молибден ишлаб чиқариш режалаштирилган.

Самарқанд ва Тошкент вилоятларида ташкил этилаётган саноат кластерлари нафақат қазиб олиш, балки бойитиш ва чуқур қайта ишлаш жараёнларини ҳам қамраб олади. Бу мамлакат ичида тўлақонли қўшилган қиймат занжирини шакллантиришга хизмат қилади.

“Traxys Group” Ўзбекистоннинг муҳим минераллар соҳасига 1 миллиард доллар сармоя киритиш ташаббуси орқали мутлақо янги молиявий ва логистика моделини илгари сурмоқда. Мутахассисларнинг фикрига кўра, ушбу келишув анъанавий “қидирув-қазиб олиш-қайта ишлаш-сотиш” схемасидан ташқари, корпоратив молиялаштириш механизмлари орқали таъминот занжирини бошқариш стратегиясини шакллантиради.

Компаниянинг Марказий Осиёдаги ҳамкори этиб Темурбек Ҳикматуллаев тайинланди. Унинг сўзларига кўра, компания Ўзбекистон технологик металлар комбинати томонидан ишлаб чиқарилган маҳсулотларни узоқ муддатли офтейк шартномалари асосида харид қилади ва келгусидаги етказиб беришларни олдиндан молиялаштириш механизмларини жорий қилади. Бундан ташқари, компания халқаро техник ва молиявий экспертизаларни жалб қилган ҳолда геология-қидирув, қазиб олиш ва қайта ишлаш соҳаларида қўшма инвестиция лойиҳаларида иштирок этади.

Янги офис ҳамкорлар фаолиятини мувофиқлаштириш, технологик алоқаларни мустаҳкамлаш ва минтақавий молия маркази сифатида фаолият юритиш орқали инвестиция лойиҳаларини жойида самарали бошқариш имкониятларини яратади.

“Traxys Group” бош ижрочи директори Марк Кристоффнинг таъкидлашича, ҳамкорлик, айниқса, "яшил" энергетикага ўтишнинг жадаллашуви ва ушбу ресурсларга глобал талабнинг ортиб бориши шароитида Ўзбекистонни стратегик минералларни етказиб бериш глобал занжирининг муҳим бўғинига айлантиришга қодир.

Ташриф давомида делегация аъзолари бир қатор расмий учрашувлар ўтказди. Хусусан, Ўзбекистон тоғ-кон саноати ва геология вазири Бобир Исломов, “Навоиуран” давлат корхонаси директори Жамол Файзуллаев ва Ўзбекистон технологик металлар комбинати раҳбари Фарҳод Абдуллаев билан музокаралар бўлиб ўтди.

Маълумки, 2025 йил 5 ноябрда Президент Шавкат Мирзиёевнинг АҚШга расмий ташрифи доирасида Ўзбекистон Тоғ-кон саноати ва геология вазирлиги ҳамда “Traxys Group” компанияси ўртасида ҳамкорлик келишуви имзоланган эди. Ушбу ҳужжат 2030 йилгача табиий уранни узоқ муддатли етказиб беришни назарда тутади. Шартномаларнинг умумий қиймати 1,7 миллиард АҚШ долларини ташкил этади.

Шунингдек, жорий йилнинг 18 февраль куни Ўзбекистон Президентининг АҚШга ташрифи доирасида “Traxys Group” раҳбарияти билан бўлиб ўтган учрашувда компания томонидан Тошкент шаҳрида Марказий Осиё бўйича минтақавий офис очиш тўғрисида қарор қабул қилингани, ушбу ҳамкорликнинг амалий натижасидан далолат беради.

Таъкидланганидек, мазкур қарор ҳамкорлик механизмларини институционал жиҳатдан мустаҳкамлаш ва тегишли органлар фаолияти самарадорлигини оширишга қаратилган.