ТОШКЕНТ, 5 декабрь. /“Дунё” АА/. Ўзбекистон ташқи ишлар вазири Бахтиёр Саидов кеча Венада Грузия ташқи ишлар вазири Мака Ботчоришвили билан учрашди, деб хабар бермоқда “Дунё” АА мухбири.

“Грузия ташқи ишлар вазири Мака Ботчоришвили хоним билан самарали учрашув ўтказдик, – деб ёзди Ўзбекистон ТИВ раҳбари ўзининг telegram-каналида. – Мамлакатларимиз ўртасидаги илиқ ва дўстона муносабатларни яна бир бор тасдиқлаб, сиёсий, иқтисодий, маданий ва минтақавий йўналишларда ҳамкорликни янада ривожлантириш имкониятларини муҳокама қилдик.

Мулоқотимиз давомида долзарб глобал жараёнлар ҳақида фикр алмашдик. Минтақамизда барқарорлик, мулоқот ва ҳамкорликни мустаҳкамлашнинг аҳамиятини алоҳида таъкидлаб ўтдик”.