ТОШКЕНТ, 5 декабрь. /“Дунё” АА/. Ўзбекистон ташқи ишлар вазири Бахтиёр Саидов кеча Вена шаҳрида “Марказий Осиё – Шимолий Европа” янги форматининг биринчи учрашувида иштирок этди, деб хабар бермоқда “Дунё” АА мухбири.

 “Марказий Осиё – Шимолий Европа” янги форматидаги илк учрашувни ўтказишдан мамнунмиз, – деб ёзди Ўзбекистон ТИВ раҳбари ўзининг telegram-каналида. – Ушбу мулоқот жорий йил Самарқандда бўлиб ўтган ва ҳамкорлигимизни стратегик шериклик даражасига кўтарган “Марказий Осиё – Европа Иттифоқи” саммити натижаларининг мантиқий давоми сифатида ташкил этилди.

Ҳар икки минтақанинг ўзаро ҳамкорликни чуқурлаштириш учун улкан, ҳали тўлиқ ишга солинмаган салоҳиятга эга эканини таъкидладик. Ҳамкорлигимизни кенгайтириш ва уни аниқ, истиқболга йўналтирилган ташаббуслар билан бойитиш вақти келди, деб ҳисоблаймиз”.

Учрашувда Шимолий Европа мамлакатлари – Исландия, Дания, Норвегия, Швеция ва Финляндия ТИВ раҳбарлари иштирок этди.