ТОШКЕНТ, 27 ноябрь. /“Дунё” АА/. Ўзбекистон ташқи ишлар вазири Бахтиёр Саидов бугун Бурунди Республикасининг мамлакатимиздаги биринчи элчиси Жозеф Нкурунзизани қабул қилди, деб хабар бермоқда “Дунё” АА мухбири.

“Бурунди давлатининг Ўзбекистондаги биринчи элчиси Жозеф Нкурунзиза жанобларининг ишонч ёрлиқларини қабул қилдик, – деб ёзди Ўзбекистон ТИВ раҳбари ўзининг telegram-каналида. – Музокараларимиз самарали ва келажакка йўналтирилган бўлиб, давлатларимиз ўртасидаги алоқаларнинг ривожланаётган салоҳияти ҳақида фикр алмашдик. Шунингдек, халқаро ва минтақавий ташкилотлар доирасидаги ҳамкорликни кучайтириш масалаларини ҳам кўриб чиқдик.

Элчи жанобларига мамлакатимиздаги фаолияти давомида муваффақиятлар тилаймиз”.

Эслатиб ўтамиз, Ўзбекистон ва Шарқий Африканинг Бурунди давлати ўртасида дипломатик муносабатлар 2024 йил 24 сентябрда ўрнатилган.

Бугун Ўзбекистон ташқи ишлар вазири Сомалининг мамлакатимиздаги биринчи элчиси Фатхудин Али Моҳамеддан ишонч ёрлиқларини қабул қилди.

“Дунё” АА олган сурат