ТОШКЕНТ, 23 апрель. /“Дунё” АА/. Ташқи ишлар вазирлигида Швеция Миграция агентлиги бош таҳлилчиси Эмма Симичич ва Дания Иммиграция хизмати катта маслаҳатчиси Алекс Хеммингсен билан учрашув бўлиб ўтди, деб хабар бермоқда “Дунё” АА мухбири.

Музокаралар чоғида томонлар миграция соҳасидаги ҳамкорлик масалаларини, шунингдек, Швеция ва Дания билан ўзаро алоқалар доирасида ушбу йўналишни янада ривожлантириш истиқболларини муҳокама қилдилар.

Ўзбекистон фуқаролари учун виза тартибларини соддалаштириш, жумладан, дипломатик паспорт эгаларини виза талабларидан озод этиш бўйича ташаббусни ишлаб чиқиш масалаларига алоҳида эътибор қаратилди.

Ўзбекистон дипломатлари ўзаро манфаатли масалаларни ҳар томонлама кўриб чиқиш мақсадида соҳавий идоралар иштирокида консуллик маслаҳатлашувларини ўтказиш таклифини илгари сурдилар.

Бундан ташқари, делегация вакилларига Ўзбекистонда мигрантлар ва уларнинг оила аъзоларини давлат томонидан қўллаб-қувватлаш борасида амалга оширилаётган чора-тадбирлар, жумладан, қулай ижтимоий-иқтисодий шароитлар яратиш ҳамда консуллик хизматларининг очиқлиги ва самарадорлигини оширишга қаратилган изчил рақамлаштириш жараёнлари ҳақида маълумот берилди.

Учрашув якунида томонлар амалий ҳамкорликни янада мустаҳкамлаш ва миграция кун тартибидаги долзарб масалалар бўйича конструктив мулоқотни давом эттиришга ўзаро тайёр эканликларини тасдиқладилар.