ИСЛОМОБОД, 25 апрель. /“Дунё” АА/. Покистоннинг етакчи “Pakistan Page”электрон нашри бўлажак V Тошкент халқаро инвестиция форумига бағишланган мақолани эълон қилди, деб хабар бермоқда “Дунё” АА мухбири.

“2026 йил 16–19 июнь кунлари Тошкент шаҳрида мамлакатимизнинг энг йирик инвестициявий платформаси ва минтақанинг энг йирик бизнес форумларидан бири - бешинчи юбилей Тошкент халқаро инвестиция форуми бўлиб ўтади” – дейилган материалда.

Маълум қилинганидек, бешинчи – юбилей форум «Investment Resilience: New Frontiers, New Partnerships» ғояси остида ташкил этиляпти. Тошкент халқаро инвестиция форуми иқтисодиёт билан бирга миқёсини ҳам кенгайтириб бормоқда. Ўтган йилги ТХИФ 8 000 дан ортиқ иштирокчини тўплади, улардан тахминан 3 000 нафари 97 та давлатдан келган хорижий делегатлар эди. Иқтисодий анжуман доирасида имзоланган шартнома ва келишувларнинг умумий ҳажми 30,5 миллиард долларга тенг бўлди.

«Юбилей форумнинг марказий мавзуси 2026 йил март ойида Ўзбекистон Президенти фармони билан ташкил этилган Тошкент халқаро молия маркази бўлади. ТХИФ-2026 ишбилармонлик дастури тўртта мазмунли блок атрофида тузилган: инвестиция барқарорлиги ва капитални ҳимоя қилиш механизмлари, молиявий инфратузилма ва капитал бозорларини ривожлантириш, савдо боғлиқлиги ва логистика коридорлари, энергетик ўтиш ва иқлимни молиялаштириш», – дейилган материалларда.

«Pakistan Page» электрон нашри мақоласида таъкидланганидек, бу йилги бўлажак форумда энергетика масалаларига катта қаратилади. Шунингдек, нашрда Ўзбекистон 2030 йилгача электр энергияси ишлаб чиқаришда қайта тикланувчи энергия манбалари улушини 54 фоизга етказишни мақсад қилгани ҳақидаги маълумот ўқувчилар ҳукмига ҳавола этилган.

Мақола якунида ёзилганидек, V юбилей Тошкент халқаро инвестиция форуми халқаро капитал учун жозибадор нуқтага ҳамда Марказий Осиёнинг инвестициялар борасидаги кун тартибини шакллантирувчи платформага айланади.