ВАРШАВА, 29 апрель. /“Дунё” АА/. Польшанинг “Ambasador” журналида мамлакатимиз сайёҳлик салоҳиятига бағишланган мақола эълон қилинди, деб хабар бермоқда “Дунё” АА мухбири.

Мақолада ёзилишича, Ўзбекистоннинг Польшадаги элчихонаси томонидан Наврўз байрами муносабати билан ОАВ ва сайёҳлик компаниялари вакиллари иштирокида маданий-маърифий тадбир ташкил этилган. Иштирокчилар Наврўз байрами тарихи ва аҳамияти ҳақида алоҳида тўхталиб ўтган. Хусусан, Наврўзнинг ўзбек халқининг миллий байрамларидан бири экани, табиатнинг уйғониши, янги йилнинг бошланиши, бирлик ва дўстлик қадриятларини ўзида мужассам этгани таъкидланган.

Учрашув давомида Ўзбекистоннинг Польшадаги элчиси Амирсаид Аъзамхўжаев иштирокчиларга мамлакатнинг туризм имкониятлари ҳақида маълумот берган. У Ўзбекистон–Польша алоқалари, сайёҳлар оқимининг ўсиши ҳамда тўғридан-тўғри авиақатновлар ва замонавий темир йўл йўналишларини ўз ичига олган транспорт қатнови имкониятларини кенгайтириш масалаларига алоҳида эътибор қаратган.

Нашрда қайд этилишича, Ўзбекистоннинг бой тарихий-маданий меросини замонавий сайёҳлик инфратузилмаси билан уйғунлаштирган Самарқанд, Бухоро, Хива каби бетакрор туристик йўналишлар туристларда катта қизиқиш уйғотмоқда. Мамлакат маданий-маърифий ва гастрономик туризмдан тортиб, экологик ва индивидуал маршрутларгача бўлган кенг имкониятларни таклиф этмоқда.

Бундан ташқари, материалда польшалик экспертларнинг Ўзбекистоннинг инвестициявий жозибадорлиги, бизнес юритиш учун қулай шароитлари ва мамлакатнинг юқори демографик салоҳияти ҳақидаги фикрлари келтирилган.

Буюк Ипак йўлининг муҳим тарихий маркази бўлган Ўзбекистон бугунги кунда халқаро ҳамкорлик учун очиқ замонавий туризм ва инвестиция йўналиши сифатидаги ўз мавқейини изчил мустаҳкамлаб бораётгани эътироф этилган.