ТОШКЕНТ, 20 январь. /“Дунё” АА/. Туркия Президенти Режеп Таййип Эрдоған бугун Анқарага икки мамлакат ташқи ишлар, ички ишлар ва мудофаа вазирлари, хавфсизлик хизматлари раҳбарларининг учрашувида иштирок этиш учун келган Ўзбекистон делегациясини қабул қилди , деб хабар бермоқда “Дунё” АА мухбири.

“Ҳамкасбларим билан биргаликда Туркия Президенти Режеп Таййип Эрдоған Жаноби Олийлари билан учрашишдан бағоят мамнунмиз, – деб ёзди Ўзбекистон ТИВ раҳбари Бахтиёр Саидов ўзининг telegram-каналида. – Ўзбекистон Президенти Шавкат Мирзиёев Жаноби Олийларининг самимий саломларини етказдик. Мамлакатларимиз ўртасидаги икки томонлама муносабатлар ижобий ривожланиш суръатини кўрсатаётгани, ўзаро манфаатли ҳамкорликни мустаҳкамлаш учун энг қулай шароитларни яратаётганини таъкидладик.

Бугунги “4+4” механизми доирасидаги учрашув ҳукуматларимизнинг турли идоралари ўртасидаги алоқалар янада мустаҳкамланаётганининг яна бир исботидир. Ташқи ишлар вазирликлари бундан кейин ҳам бор имкониятларини Раҳбарларимиз ўртасида эришилган барча келишувларни амалга оширишга йўналтирадилар”.

“Дунё” АА олган сурат