МОСКВА, 22 апрель. /“Дунё” АА/. Россиянинг “Вести туризм” ахборот агентлигида май ойида саёҳат қилиш учун энг оммабоп йўналишларга бағишланган мақола эълон қилди, деб хабар бермоқда “Дунё” АА мухбири.

Агентликнинг ёзишича, “Туту” сайёҳлик хизмати россияликларнинг май ойида дам олиш учун қаерга боришини таҳлил қилган. Тадқиқот натижаларига кўра, хорижий йўналишлар орасида Ўзбекистон етакчи ўринни эгаллаган.

Мазкур давр учун банд қилинган авиачипталар умумий сонининг 16 фоизи Ўзбекистон ҳиссасига тўғри келади. Бу йўналишда 2025 йилнинг май ойида мамлакатимиз рейтингда учинчи ўринни эгаллаган эди.

Жорий йилда иккинчи ўринни 15 фоиз кўрсаткич билан Туркия, учинчи ўринни эса Беларусь банд этди.

“Туту”нинг авиапарвозлар бозорини ривожлантириш бўйича директор ўринбосари Артём Кузьминнинг фикрича, бу йил сайёҳлик талабининг қайта тақсимланиши кузатилмоқда. У айрим йўналишлар арзонроқ нархлар ва қулай транспорт логистикаси туфайли ўз мавқейини мустаҳкамлаётганини таъкидлаган.

2025 йилда Россиядан Ўзбекистонга сайёҳлар оқими 1 миллион кишига яқинлашиб, 2024 йилга нисбатан 15–20 фоизга ошгани қайд этилган.