ТОШКЕНТ, 10 декабрь. /“Дунё” АА/. Ўзбекистон ташқи ишлар вазири ўринбосари Бобур Усманов кеча Беларусь элчиси Александр Огородников билан учрашув ўтказди, деб хабар бермоқда “Дунё” АА мухбири.

ТИВ маълумотига кўра, томонлар жорий йилда Ўзбекистон–Беларусь муносабатларини ривожлантириш борасида амалга оширилган ишларнинг натижаларини кўриб чиқдилар.

Икки томонлама ҳамкорликнинг изчил мустаҳкамланиб бораётгани мамнуният билан қайд этилди. Бу эса сиёсий мулоқот фаоллашуви, савдо ҳажмининг барқарор ўсиши, иқтисодиётнинг устувор йўналишларида лойиҳаларнинг амалга оширилиши, парламентлараро алоқаларнинг давом этиши ҳамда маданий-гуманитар алмашинувларнинг кучайиши орқали намоён бўлмоқда.

Шунингдек, учрашув давомида 2026 йилда ўтказиладиган асосий тадбирлар, жумладан, турли даражадаги ўзаро ташрифлар бўйича фикр алмашилди.

“Дунё” АА олган сурат