ЛОНДОН, 24 декабрь. /"Дунё" АА/. Ўзбекистон элчиси Равшан Усманов Британия Парламенти Жамоатлар палатаси Ташқи ишлар қўмитаси раиси Эмили Торнберри ва депутат Жон Виттингдейл билан музокаралар ўтказди, деб хабар қилмоқда "Дунё" АА мухбири.

Учрашув давомида Британия томони Янги Ўзбекистонда амалга оширилаётган кенг-кўламли ислоҳотлар ва охирги йиллар давомида республиканинг сиёсий, иқтисодий, ижтимоий ва маданий соҳаларда эришган ютуқлари билан батафсил таништирилди.

Британия Парламенти аъзолари Ўзбекистонда юз бераётган янгиланиш ва ўзгаришларни ижобий баҳолаб, Лондоннинг Тошкент билан барча жабҳаларда алоқаларни кенгайтиришдан манфаатдор эканлигини таъкидлади.

Суҳбат давомида парламентлараро ҳамкорликни янада кенгайтириш, хусусан Британия Парламентининг янги аъзолари билан алоқаларни жадаллаштириш масалалари бўйича фикр алмашилди.

Британия томони 2025 йилнинг 5-9 апрель кунлари тарихда илк бор Ўзбекистонда Парламентлараро иттифоқнинг (IPU) 150-ассамблеясининг ўтказилиши республиканинг халқаро майдондаги ижобий имижини янада мустаҳкамлаш, барқарор тараққиёт ва жаҳон давлатлари билан ҳамкорликни кучайтириш йўлида муҳим қадам бўлишини таъкидлади.

Ҳозирги кунда Британия Парламентида IPUнинг Тошкентдаги йиғилишига қатнашиш учун ушбу мамлакат вакилларидан иборат нуфузли делегация шакллантирилмоқда.

Музокаралар якунида икки мамлакат ўртасидаги ҳамкорликни янада кенгайтириш учун мавжуд салоҳиятни рўёбга чиқариш бўйича амалий алоқаларни давом эттириш бўйича келишувга эришилди.