ЛОНДОН, 27 август. /"Дунё" АА/. Ўзбекистон элчиси Равшан Усманов Британия Кенгаши бош директорининг глобал ҳамкорлик бўйича ўринбосари Чарли Уолкер билан учрашув ўтказди, деб хабар қилмоқда "Дунё" АА мухбири.

Учрашув аввалида Британия томони Янги Ўзбекистонда амалга оширилаётган кенг-кўламли ислоҳотлар ва яқинда давлат вакиллик органларига бўлиб ўтадиган сайловларга тайёргарлик жараёни билан таништирилди.

Чарли Уолкер сўнгги йилларда Ўзбекистонда таълим соҳасида олиб борилаётган самарали ислоҳотлар, ёшларнинг сифатли таълим олиши ва чет тилларини, хусусан инглиз тилини мукаммал ўрганиши учун яратиб берилаётган шароитларни юқори баҳолади.

Британия Кенгашининг Ўзбекистон билан ўрта ва олий таълим соҳаларида ҳамда санъат ва маданият йўналишларида ҳамкорликни янада кенгайтириш ва мустаҳкамлашдан манфаатдор эканлиги қайд этилди.

"Биз 2-4 октябрь кунлари Ўзбекистонда креатив иқтисодиётга бағишланган халқаро конференция ўтказилишини олқишлаймиз. Шунингдек, Британия кенгаши томонидан ушбу тадбирни юқори даражада ташкил этилишида амалий кўмак кўрсатилиши маълум қиламиз", - деди у.

Учрашув якунида Британия Кенгашининг Ўзбекистонда инглиз тилини ўқитиш дастурларини кенгайтириш ва хорижий томоннинг шу йил 15-17 октябрь кунлари Тошкент шаҳрида ўтказиладиган Марказий Осиё таълим форумида иштирок этиши бўйича келишувга эришилди.