ЛОНДОН, 1 июнь. /"Дунё" АА/. Ўзбекистон элчиси Равшан Усманов Буюк Британиянинг "Albertson Solicitors" халқаро юридик компанияси бошқарувчи ҳамкори Наги Идрис билан учрашди, деб хабар қилмоқда "Дунё" АА мухбири.

2021 йилда ташкил этилган "Albertson Solicitors"нинг бош қароргоҳи Лондонда бўлиб, компания хусусий шахслар, корпоратив мижозлар ва давлатлар учун юқори сифатли ҳуқуқий хизматларни тақдим этади.

Компания Европа, Яқин Шарқ, Марказий Осиё ва Африка минтақаларида халқаро ҳуқуқий масалаларга ихтисослашган ва тажрибали мутахассислар жамоасига эга.

Суҳбат давомида Наги Идрис Ўзбекистонда амалга оширилаётган кенг кўламли иқтисодий ислоҳотларни, хусусан, хорижий инвесторлар учун яратилаётган қулай ва шаффоф ҳуқуқий муҳитни юқори баҳолади. Унинг таъкидлашича, сўнгги йилларда мамлакатимиздаги инвестицион муҳитни яхшилаш, хусусий секторни қўллаб-қувватлаш ва суд-ҳуқуқ тизимини ислоҳ қилиш борасида амалга оширилаётган ишлар халқаро ҳамжамиятда катта қизиқиш уйғотмоқда.

Шу муносабат билан, "Albertson Solicitors" компанияси Ўзбекистондаги иқтисодий ва ҳуқуқий жараёнларда иштирок этиш, қонунчиликни такомиллаштириш ва чет эл сармоядорларига маслаҳат хизматлари кўрсатиш орқали мамлакатнинг халқаро нуфузини янада оширишга ўз ҳиссасини қўшишга тайёр эканини билдирди.

"Albertson Solicitors" компанияси билан ҳамкорликда Буюк Британияда Ўзбекистоннинг иқтисодий салоҳияти ва инвестициявий имкониятлари, мамлакатимизда олиб борилаётган демократик жараёнларни янада кенг тарғиб қилиш бўйича қўшма тадбирлар ўтказиш юзасидан келишувга эришилди.

Хусусан, "Albertson Solicitors" компанияси шу йил 26 июнь куни Лондонда "Ўзбекистон ҳуқуқ куни" (Uzbek Law Day) бизнес-форумини ташкил этишда амалий кўмак кўрсатишга тайёрлигини билдирди.