ВАРШАВА, 24 декабрь. /"Дунё" АА/. Варшава шаҳрида Ўзбекистон дипломатлари Польшанинг "LOT Polish Airlines" авиакомпанияси президенти Михал Фиёл билан учрашув ўтказди, деб хабар бермоқда "Дунё" АА мухбири.

Польша томонининг маълум қилишича, авиакомпания 2024 йил март ойидан Варшава ва Тошкент ўртасида тўғридан-тўғри парвозларни йўлга қўяди.

Михал Фиёл сўзига кўра, компания делегациясининг шу йил ёзидаги Ўзбекистонга ташрифи якунлари бўйича Транспорт вазирлиги, Фуқаро авиацияси агентлиги, "Uzbekistan Airports" АЖ ҳамда "Uzbekistan Airways" АЖ вакиллари билан ўрнатилган алоқалар ўз самарасини бермоқда.

Авиакомпания президентининг таъкидлашича, анъанага кўра, биринчи рейсда Польша ташқи ишлар вазири ўринбосари, туризм вазири ўринбосари, парламент вакиллари вa бошқа расмий шахслар Ўзбекистонга келади.

Таъкидланганидек, Варшава–Тошкент йўналиши бўйича парвозларга талаб юқорилигини ҳисобга олиб, 2024 йилнинг апрель-июнь ойларида парвозлар ҳафтасига 4 марта амалга оширилади. Шунингдек, Польша авиакомпанияси президенти йилига жами 40 минг йўловчи ташиш мумкинлигини қайд этди.