ОТТАВА, 28 июнь. /"Дунё" АА/. Ўзбекистоннинг Канададаги элчиси (қароргоҳи Вашингтон шаҳрида) Фурқат Сидиқов Канада Генерал-губернатори Мэри Симонга ишонч ёрлиқларини топширди, деб хабар қилмоқда "Дунё" АА мухбири.

Тантанали маросимдан сўнг бўлиб ўтган учрашувда Канада Генерал-губернатори Ўзбекистонда амалга оширилаётган изчил ижтимоий-иқтисодий ва демократик ислоҳотлар, Марказий Осиёда яхши қўшничилик, миллатлараро тотувлик ва бағрикенгликни таъминлаш борасида эришилаётган ютуқлардан яхши хабардор эканини таъкидлади. Унинг айтишича, бу саъй-ҳаракатлар Канада ҳукумати томонидан тўлиқ қўллаб-қувватланади ва икки томонлама муносабатлар кўламини кенгайтириш учун замин яратади.

Ўзбекистон ва Канада иқтисодиёти ўзаро манфаатли ҳамкорликни янада кенгайтириш учун катта салоҳиятга эга экани билдирилди. Шу нуқтаи назардан, доимий равишда ўзаро иқтисодий ташрифлар ва савдо миссиялари алмашинувини йўлга қўйиш таклиф этилди.

Эслатиб ўтамиз, Фурқат Сидиқов 2023 йилнинг май ойида Ўзбекистоннинг АҚШдаги элчиси сифатида Президент Жо Байденга ишонч ёрлиқларини топширган эди. Шунингдек, у октябрь ойида Ўзбекистоннинг Бразилиядаги элчиси (қароргоҳи Вашингтонда) этиб тайинланганлиги тўғрисидаги ишонч ёрлиғи нусхасини топширган. Шу тариқа, Ўзбекистоннинг АҚШдаги элчиси Бразилия ва Канадада ҳам мамлакатимизнинг расмий вакили ҳисобланади.

Аввал Ўзбекистон ташқи ишлар вазирининг биринчи ўринбосари лавозимида ишлаган Фурқат Сидиқов 53 ёшда. У 1993 йилда Тошкент давлат техника университетини тамомлаган. Меҳнат фаолияти давомида "ЎзДэуЭлектроникс" ҚК, Ўзбекистон Республикаси Президенти ҳузуридаги Стратегик ва минтақалараро тадқиқотлар институти ишлаган. 2002 йилдан бери ТИВ тизимида турли лавозимларда фаолият кўрсатиб келмоқда. Хусусан, Ўзбекистоннинг АҚШдаги элчихонасида, Покистондаги элчи, вазирнинг ўринбосари ва биринчи ўринбосари лавозимларида ишлаган.

Фурқат Сидиқов 2017-2023 йилларда Ўзбекистоннинг АҚШ, шунингдек, ўриндошлик асосида Канада ва Бразилиядаги элчиси бўлиб ишлаган Жавлон Вахобов ўрнига тайинланган.