ЛОНДОН, 11 июнь. /"Дунё АА/. Лондон мэрияси томонидан Буюк Британия пойтахтидаги Трафальгар майдонида ташкил этилган фестивалда ўзбек миллий таомлари тақдимоти ўтказилди, деб хабар қилмоқда "Дунё" АА мухбири.

Тақдимот Ўзбекистоннинг Буюк Британиядаги элчихонаси ва "OshPaz" ресторани билан биргаликда ташкил этилди.

Лондон мэри ташаббуси билан анъанавий тарзда ўтказилиб келинадиган мазкур фестиваль доирасида дунё ошхонаси ва пазандачилигининг энг илғор намоёндалари ҳамда ресторанлари иштирок этди.

Тадбир давомида ташриф буюрувчиларга ўзбек миллий таомлари тақдим этилди, уларни тайёрлаш жараёнлари ва тарихи ҳақида маълумотлар берилди.

 Фестиваль меҳмонларининг аксарияти Ўзбекистон ва миллий таомлари ҳақида яхши билишларини таъкидладилар.