ЛОНДОН, 25 август. /"Дунё" АА/. Мамлакатимиз элчихонасида Буюк Британиянинг "Hudson Sandler" компаниясининг Марказий Осиё бўйича масъул вакиллари Чарли Жек ва Кристина Гайсина билан учрашув бўлиб ўтди, деб хабар қилмоқда "Дунё" АА мухбири.

Музокаралар чоғида Ўзбекистон-Британия икки томонлама кун тартибини изчил кенгайтириш мақсадида юқори даражадаги тадбирларни ташкил этиш масалалари муҳокама қилинди.

Хусусан, "G2B" ва "B2B" форматидаги ҳамкорликни кучайтириш, Британиянинг йирик компания ва брендлари билан яқин алоқаларни йўлга қўйиш муҳим аҳамиятга эга экани таъкидланди. Шунингдек, Ўзбекистон компанияларининг халқаро капитал бозорларига чиқишига тизимли кўмак бериш устувор вазифа эканлиги қайд этилди.

Учрашув якунида келгусида режалаштирилган тадбирларни ҳукумат ва бизнес доираларни жалб этган ҳолда юқори даражада ташкил этиш борасидаги саъй-ҳаракатларни мувофиқлаштиришга келишиб олинди.

1986 йилда ташкил этилган "Hudson Sandler" компанияси стратегик коммуникациялар ва консалтинг хизматларини кўрсатади. Шунингдек, мижозларига корпоратив бошқарув, йирик компания ва брендлар билан коммуникациялар ўрнатишга қаратилган хизматларни таклиф этади.