DAKAR, 28-iyun. /“Dunyo” AA/. Kongo Demokratik Respublikasida Ebola infeksiyasi tasdiqlangan holatlar soni 3200 taga yetdi, shundan 1405 nafari vafot etdi, deb xabar qilmoqda “Dunyo” AA muxbiri.

“Reuters” agentligining xabar berishicha, Kongoda Ebola virusi tarqalishi davom etar ekan, tasdiqlangan kasallanish holatlari 3 ming 200 taga yetdi. Bu haqda mamlakat hukumati rasmiy maʼlumot bergan.

Epidemiya boshlanganidan buyon virus oqibatida 1 ming 405 kishi hayotdan ko‘z yumgan. Hukumat kasallik tarqalishini cheklash maqsadida yuqori xavfli hududlarda tibbiy kuzatuv, bemorlarni izolyatsiya qilish va aholini xabardor qilish ishlarini kuchaytirmoqda.

Ebola infeksiyasi yuqumli va o‘lim darajasi yuqori bo‘lgan virusli kasallik bo‘lib, u insonlar o‘rtasida tana suyuqliklari orqali yuqadi. Mutaxassislar kasallikni barvaqt aniqlash, bemorlarni tezkor davolash va emlash tadbirlari epidemiyani nazorat qilishda muhim ahamiyatga ega ekanini taʼkidlamoqda.

Kongo ilgari ham Ebola epidemiyalari bilan bir necha bor to‘qnash kelgan bo‘lib, ayniqsa mamlakatning sharqiy hududlaridagi xavfsizlik muammolari va cheklangan tibbiy infratuzilma kasallikka qarshi kurashni qiyinlashtirmoqda.