VASHINGTON, 24-avgust. / “Dunyo” AA/. AQSh Eronga qarshi yangi katta sanksiyalar paketini tayyorlamoqda, moliya vaziri Skott Bessent buni “tarixdagi eng yirik iqtisodiy hujum” deb atadi, deb xabar bermoqda “Dunyo” AA muxbiri “AP” agentligiga tayanib.

Vashington Tehronning iqtisodiy va moliyaviy kanallarini yopib qo‘yish niyatida. Eron uchun moliyaviy yo‘nalish bo‘lib qolayotgan mamlakatlar va tashkilotlar bosim kuchayishi hamda iqtisodiy yakkalanishga tayyor turishi kerak.

Skott Bessent agar Eron Amerika kuchlari yoki Fors ko‘rfazidagi qo‘shnilariga qarshi harbiy harakatlar qilsa, Prezident Donald Tramp tez va qatʼiy javob qaytarishidan ogohlantirdi. Vazir bugun yangi chora-tadbirlar tafsilotlarini taqdim etishi kutilmoqda.

Eron tashqi ishlar vaziri Abbos Aroqchi yangi sanksiyalar tahdidini AQShning chorasizligi alomati deb atadi.

“Ularning harbiy amaliyotlardan o‘sha eski rejalarga qaytgani umidsizlikka tushganidan dalolat beradi”, – dedi diplomat.

Uning qo‘shimcha qilishicha, Tehron bosimdan qo‘rqmaydi, yangi sanksiyalar esa, AQShning avvalgi harakatlari kabi, muvaffaqiyatsizlikka uchraydi. U Vashingtonni adolat va qadr-qimmat asosidagi muzokaralarga chaqirdi.

Shu bilan birga, Ho‘rmuz bo‘g‘ozi atrofida keskinlik saqlanib qolmoqda. Eron o‘zining o‘tish qoidalarini buzgan kemalar jarimaga tortilishi, ushlab turilishi yoki musodara qilinishi mumkinligini maʼlum qildi.

Ko‘rfazga va undan tashqariga yuk tashish bilan shug‘ullanuvchi yuk jo‘natuvchilarga Tehron qoidabuzar deb hisoblaydigan kemalar ro‘yxatini oldindan tekshirib olish tavsiya etildi.

Bir kun avval “Axios” nashri AQSh Ummon qirg‘oqlari yaqinida yashirin dengiz yo‘nalishini tashkil etgani haqida xabar bergan edi. Bu yo‘nalish orqali har kecha 10 million barrelga yaqin neft tashuvchi 15–20 ta tanker o‘tadi – bu urushgacha bo‘lgan hajmning qariyb yarmini tashkil etadi.

Ayni paytda diplomatik saʼy-harakatlar davom etmoqda. Bugun Pokiston armiyasi qo‘mondoni Osim Munir Tehronga tashrif buyuradi. Tashrif davomida so‘nggi voqealar, jumladan, AQShning yangi sanksiyalari tahdidini muhokama qilish rejalashtirilgan.

Ertasi kuni Ho‘rmuz bo‘g‘ozi atrofidagi vaziyat yuzasidan muzokaralarni davom ettirish uchun O‘mon tashqi ishlar vaziri Badr bin Hamad al-Busaidiy Eronga keladi.

AQSh prezidentining aytishicha, Eron kelishuv tuzishni istaydi, biroq hozircha to‘g‘ri kelishuvga tayyor emas. Eron prezidenti Masʼud Pezeshkiyon esa avvalroq diplomatik yechim tarafdori ekanini bildirgandi.

“Reuters” agentligi surati