ВАШИНГТОН–ТЕҲРОН, 22 август. /“Дунё” АА/. Эрон Президенти Масъуд Пезешкиён АҚШ билан қарийб олти ойдан буён давом этаётган урушни якунлашга чақирди, деб хабар бермоқда “Дунё” АА мухбири “Al Jazeera” телеканалига таяниб.

“Урушни бугун, биз кучли ва ўз қадр-қимматимизни сақлаб турган бир пайтда якунлаганимиз маъқул”, — деди у. Президент Масъуд Пезешкиён июнь ойида имзоланган меморандум бўйича Эрон АҚШга ён бергани ҳақидаги айбловларни рад этиб, ушбу келишувда таслим бўлишни англатадиган бирор банд мавжуд эмаслигини қайд этди.

Бироқ Теҳроннинг расмий позициясида музокараларга тайёрлик билан бир қаторда кескин огоҳлантиришлар ҳам янграмоқда. Эрон Қуролли кучлари Бош штаби бошлиғи, генерал-майор Али Абдуллоҳий мамлакатга нисбатан янги таҳдидлар юзага келган тақдирда, уларга вайронкор ва ҳалокатли зарба билан жавоб берилишини билдирди.

Вашингтон ҳам босим чораларини кучайтириш ниятида. АҚШ молия вазири Скотт Бессент келаси ҳафта Эрон ва унинг савдо ҳамкорларига қарши янги санкцияларни тақдим этиши кутилмоқда.

Айни пайтда Эрон ва Ўмон Ҳурмуз бўғозидаги вазиятни барқарорлаштириш, музокараларни қайта тиклаш ва халқаро кемалар қатновини қайта йўлга қўйиш масалаларини муҳокама қилмоқда. 20 август куни стратегик аҳамиятга эга ушбу денгиз йўлаги орқали атиги тўртта юк кемаси ўтган, улар орасида йирик нефть ва газ танкерлари бўлмаган.

Ҳурмуз бўғозидаги кескинлик жаҳон энергетика бозори учун ҳам жиддий хавф туғдирмоқда. АҚШ энергетика вазири Крис Райтнинг маълум қилишича, ҳозир АҚШ ҳарбийлари кўмагида бўғоз орқали кунига қарийб 8 миллион баррелm нефть ташилмоқда. Урушдан олдин эса мазкур кўрсаткич 20 миллион баррелдан ортиқ бўлган.

Президент Дональд Трамп, ўз навбатида, АҚШ Ҳурмуз бўғози ҳудудини тўлиқ назорат қилаётганини таъкидлаб, Эронни қўллаб-қувватлаётган давлатларга нисбатан иқтисодий чоралар кўриш билан таҳдид қилди. Шунингдек, у ижтимоий тармоқларда бўғозни АҚШ ҳудуди деб эълон қилди.

АҚШнинг ҳарбий зарбалари Эрон иқтисодиёти ва унинг мудофаа салоҳиятига жиддий зарар етказган бўлса-да, Теҳрон ракета ва учувчисиз учиш аппаратларидан фойдаланиш имкониятини сақлаб қолмоқда.

Шу нуқтаи назардан, Эрон раҳбарияти мамлакатнинг нафақат ҳарбий, балки иқтисодий барқарорлигига ҳам алоҳида эътибор қаратмоқда. Эрон парламенти спикери Муҳаммад-Боқир Қолибоф аввалроқ мамлакатнинг келажакдаги барқарорлиги ҳарбий қудрат билан бир қаторда иқтисодий салоҳиятга ҳам бевосита боғлиқ эканини таъкидлаган эди. “Ҳарбий қудратимиз қанчалик катта бўлмасин, агар халқ оч қолса, молиявий айланма, иқтисодий ўсиш ва миллий ишлаб чиқариш бўлмаса, биз яшай олмаймиз”, — деган у.

“Reuters” агентлиги сайтидан олинган сурат