DUSHANBE, 21-oktabr. /“Dunyo” AA/. Tojikiston Milliy fanlar akademiyasi Falsafa, siyosatshunoslik va huquq instituti ilmiy xodimi Viktor Kim “Dunyo” axborot agentligiga bergan intervyusida AQSh Davlat kotibi Marko Rubioning O‘zbekistonga amaliy tashrifi yuzasidan o‘z fikr-mulohazalarini bildirdi, deb xabar bermoqda “Dunyo” AA muxbiri.

– Samarqandda AQSh Davlat kotibi Marko Rubio va nufuzli Amerika biznes delegatsiyasi ishtirokida “C5+1” formatida bo‘lib o‘tgan vazirlar uchrashuvi chinakam tarixiy voqea bo‘ldi.

2015-yilda ushbu format mazkur qadimiy shaharda Amerika qo‘shinlarining Afg‘onistondan olib chiqilishi sharoitida amalga oshirilgan edi. O‘shanda Vashington mintaqaga xavf-xatarlar va harbiy tahdidlar nuqtai nazaridan qaragan.

O‘n bir yil o‘tib, biz tubdan boshqacha manzarani kuzatmoqdamiz. Gap shunchaki muloqotning qayta tiklanishi haqida emas, balki AQShning Markaziy Osiyoga mutlaqo yangi maqomda qaytishi haqida bormoqda.

AQShning ikki yuzdan ortiq yirik korporatsiyalari rahbarlarining Samarqandga tashrifi Vashington endilikda mintaqani xavfsiz va yuqori istiqbolli savdo chorrahasi sifatida ko‘rayotganini anglatadi.

Bu o‘zgarishlar Markaziy Osiyodagi ichki o‘zgarishlar tufayli amalga oshdi. 2017-yildan buyon O‘zbekiston mintaqaviy konsolidatsiyaning asosiy harakatlantiruvchi kuchlaridan biriga aylandi.

Qo‘shnilar bilan ko‘p yillik suv, chegara va transport sohalaridagi kelishmovchiliklarning hal etilishi, davlat rahbarlarining muntazam maslahat uchrashuvlarining yo‘lga qo‘yilishi Markaziy Osiyoni geografik tushunchadan siyosiy jihatdan yana-da jipslashgan mintaqaga aylantirdi.

Bugungi kunda uchrashuvning ahamiyati Markaziy Osiyoning global geoiqtisodiyotning mustaqil markazi sifatidagi maqomini mustahkamlashdan iborat. Geosiyosiy beqarorlik sharoitida mintaqa Sharq va G‘arb, Shimol va Janub o‘rtasidagi muhim ko‘prikka aylanmoqda. AQSh yangi logistika zanjirlarini shakllantirishda ishtirok etish va muhim minerallar, texnologiyalar hamda energiya resurslaridan foydalanish imkoniyatini ta’minlashga intilmoqda.

Ushbu jarayonda O‘zbekistonning alohida o‘rni bor. Bunday yuqori darajadagi muzokaralar uchun Samarqandning tanlanishi mamlakatning mintaqadagi diplomatik va logistika markazi sifatidagi ahamiyatini ifodalaydi. O‘zbekiston o‘zining salmoqli demografik salohiyati hamda Markaziy Osiyoning barcha mamlakatlari va Afg‘oniston bilan umumiy chegaralari tufayli yirik xalqaro investitsiya va ishlab chiqarish markazlarini joylashtirish uchun qulay sharoitlarga ega.

Samarqandda bo‘lib o‘tgan “C5+1” uchrashuvi AQSh va Markaziy Osiyo munosabatlarida muhim bosqich bo‘lishi mumkin. Vashington Markaziy Osiyoni o‘z mustaqilligini mustahkamlayotgan mintaqa, O‘zbekistonni esa Yevroosiyo hamkorligi va iqtisodiy integratsiyasini rivojlantirishda muhim bo‘g‘in sifatida ko‘rmoqda.