ISTANBUL, 8-yanvar. /“Dunyo” AA/. 12-15-yanvar kunlari Venada Turkiy davlatlar tashkilotiga (TDT) aʼzo davlatlar, xalqaro tashkilotlar, diplomatik missiyalar va turkiy diaspora vakillari ishtirokida Turkiy haftalik bo‘lib o‘tadi, deb xabar bermoqda “Dunyo” AA muxbiri.

TDT kotibiyati maʼlumotiga ko‘ra, haftalikda turkiy dunyoning boy madaniy merosi va tobora o‘sib borayotgan o‘zaro hamkorligiga urg‘u beriladi. Ushbu haftalik BMTning Vena shahridagi bo‘limida “Ipak yo‘lida turkiy dunyo” fotoko‘rgazmasining ochilish marosimi bilan boshlanadi.

TDT va Turkiy akademiya hamkorligida tashkil etilgan ko‘rgazmada turkiy dunyoning umumiy tarixi va madaniy merosiga alohida eʼtibor qaratiladi.

Turkiy davlatlar tashkilotining Xofburgdagi binosida bo‘lib o‘tadigan “Ipak yo‘lidan O‘rta koridorgacha: transport orqali o‘zaro bog‘liqlikni rag‘batlantirish va savdo tartib-taomillarini soddalashtirish” mavzusidagi yuqori darajadagi davra suhbati TDTning haftalik doirasidagi muhim tadbirlardan biri bo‘ladi. Unda ishtirokchilar transport, savdo tartib-taomillarini soddalashtirish va Sharq-G‘arb o‘zaro bog‘liqligining strategik ahamiyati masalalariga to‘xtalib o‘tadi.

Turkiy haftalik doirasida Yevropa bo‘ylab turkiy diaspora tashkilotlarida muvofiqlashtirish, institutsional salohiyat va odamlar o‘rtasidagi aloqalarni mustahkamlashga qaratilgan trening dasturi ham o‘tkaziladi. Dasturda turk dunyosining madaniy boyligi va badiiy xilma-xilligini namoyish etuvchi taniqli turk sanʼatkorlari ishtirokida gala-konsert tashkil etiladi.

Venadagi haftalik turkiy dunyoning strategik qarashlari, madaniy merosi va hamkorlik dasturini ilgari surish uchun muhim platforma bo‘lishi kutilmoqda.