VARSHAVA, 10-may. /“Dunyo” AA/. Polshaning Toshkentdagi sobiq elchisi Marian Pshejdzeskiy O‘zbekiston bilan munosabatlar barqaror rivojlanib borayotganini taʼkidlab, ikki davlat o‘rtasidagi iqtisodiy, taʼlim va gumanitar hamkorlik kengayib borayotganini taʼkidladi, deb xabar bermoqda “Dunyo” AA muxbiri “Polskie Radio” portaliga tayanib.

Marian Pshejdzeskiyning so‘zlariga ko‘ra, so‘nggi yillarda ikki davlat o‘rtasidagi iqtisodiy hamkorlik sezilarli darajada faollashdi. O‘zbekistonda amalga oshirilgan islohotlar va biznes yuritish sharoitlarining yaxshilanishi savdoning o‘sishiga va Polsha kompaniyalarining O‘zbekiston bozoriga qiziqishi ortishiga xizmat qildi.

Shu bilan birga, anʼanaviy transport yo‘nalishlarining cheklanishi fonida logistika asosiy muammolardan biri bo‘lib qolmoqda. Shu munosabat bilan Polsha O‘zbekiston bilan raqamlashtirish, yuqori texnologiyalar, energetika va sanoat sohalarida hamkorlikni tobora faol rivojlantirmoqda.

Diplomat taʼlim sohasidagi hamkorlikka alohida eʼtibor qaratdi. Polsha o‘zbekistonlik talabalar uchun mashhur yo‘nalishlardan biri bo‘lib qolmoqda, ikki mamlakat oliy o‘quv yurtlari o‘rtasida qo‘shma loyihalar va akademik almashinuv dasturlari amalga oshirilmoqda.

Marian Pshejdzeskiyning so‘zlariga ko‘ra, O‘zbekistondagi polyak diasporasi, ikki bozor tutashgan joyda ishlayotgan Polsha universitetlarining yosh bitiruvchilari ham munosabatlarni mustahkamlashda muhim rol o‘ynaydi.

Shuningdek, u tarixiy ziddiyatlarning yo‘qligi va manfaatlarning mos kelishi Polsha–O‘zbekiston hamkorligini yana-da rivojlantirish uchun mustahkam asos yaratishini taʼkidladi.