VASHINGTON, 4-sentabr. / "Dunyo" AA/. AQShning nufuzli "The National Interest" tahliliy nashrida O'zbekistonning AQShdagi elchisi Furqat Sidiqov bilan mamlakatimiz mustaqilligining 35 yilligi, Yangi O'zbekiston transformatsiyasi hamda o'zbek-amerika strategik sherikligini yanada chuqurlashtirish istiqbollariga bag'ishlangan intervyu chop etildi, deb xabar bermoqda "Dunyo" AA muxbiri.

Ushbu nashr "Center for the National Interest" yetakchi eksperti Endрю Kachins tomonidan tayyorlangan. Muloqot davomida O'zbekistondagi islohotlar, xususiy sektorni rivojlantirish, AQSh bilan investitsiyaviy va texnologik hamkorlik, muhim minerallar, mintaqaviy xavfsizlik va Markaziy Osiyodagi hamkorlik istiqbollariga alohida e'tibor qaratilgan.

Qayd etilishicha, 35 yillik mustaqillik davrida O'zbekiston salmoqli yo'lini bosib o'tdi va so'nggi yillarda mamlakat rivojlanishining sifat jihatidan yangi bosqichiga qadam qo'ydi. Mamlakatimiz elchisining so'zlariga ko'ra, bugungi kunda Yangi O'zbekiston konsepsiyasi O'zbekistonning chuqur transformatsiyasini, uning dunyoga yanada ochiqligini, tadbirkorlik imkoniyatlari kengayganini, davlat xizmatlari sifati oshganini, ta'lim rivojlanishini hamda yoshlarning iqtisodiy va ijtimoiy hayotdagi faol ishtirokini aks ettiradi.

Nashrning salmoqli qismi bugungi kunda kengaytirilgan strategik sheriklik darajasiga ko'tarilgan o'zbek-amerika munosabatlari dinamikasiga bag'ishlangan. Ta'kidlanganidek, O'zbekiston Prezidenti Shavkat Mirziyoyev va AQSh Prezidenti Donal'd Tramp o'rtasidagi siyosiy muloqot hozirgi ijobiy dinamikaning muhim omili hisoblanadi. Oliy darajada erishilgan kelishuvlar aniq iqtisodiy mazmun bilan boyitildi. Xususan, Amerika-O'zbekiston biznes va investitsiya kengashi, shuningdek, AQShning Xalqaro moliyaviy taraqqiyot korporatsiyasi (DFC), AQSh Eksport-import banki (EXIM) va O'zbekiston Tiklanish va taraqqiyot jamg'armasi ishtirokidagi qo'shma investitsiya platformasi tashkil etilgani alohida qayd etilgan.

Intervyuda xususiy sektorni rivojlantirish va O'zbekistondagi investitsiya muhitini yaxshilash masalalariga ham alohida to'xtalib o'tilgan. Amalga oshirilayotgan islohotlar iqtisodiyotda davlat ishtirokini qisqartirish, xususiy investitsiyalar uchun imkoniyatlarni kengaytirish va investorlar huquqlari himoyasini mustahkamlashga qaratilgan. Ushbu o'zgarishlarning muhim elementi huquqiy tizimi ingliz umumiy huquqiga asoslanadigan Toshkent xalqaro moliya markazi bo'ladi.

Intervyuning alohida bloki yangi global yetkazib berish zanjirlarini shakllantirish sharoitida tobora katta ahamiyat kasb etayotgan muhim minerallar sohasidagi hamkorlikka bag'ishlangan. Furqat Sidiqov ta'kidlaganidek, bu sohada ikki mamlakat manfaatlari bir-birini to'ldiradi. AQSh muhim materiallar manbalarini diversifikatsiya qilishdan manfaatdor bo'lsa, O'zbekiston ilg'or texnologiyalar va investitsiyalarni jalb etish, qayta ishlashni kengaytirish va yangi bozorlarga chiqishdan manfaatdor. Hamkorlikning muhim tarkibiy qismi kadrlar tayyorlashdir. AQShning "Colorado School of Mines" instituti bilan birgalikda Toshkentdagi Geologiya fanlari universiteti huzurida Geologiya, konchilik ishi va muhim minerallar sohasida ilg'or tajriba markazini tashkil etish bo'yicha ishlar olib borilmoqda.

Shuningdek, suhbatda O'zbekistonning mintaqaviy o'zaro bog'liqlikni rivojlantirishdagi ortib borayotgan roli qayd etilgan. Samarqandda "C5+1" formatidagi tashqi ishlar vazirlarining bo'lajak uchrashuvi savdo, transport, energetika va mintaqaviy xavfsizlik sohalarida amaliy hamkorlikni kengaytirish imkoniyati sifatida ko'rib chiqilmoqda. Shu bilan birga, Afg'onistonni yakalab qo'yishga yo'l qo'ymaslik, insonparvarlik yordami ko'rsatish va uni mintaqaviy transport, energetika hamda infratuzilma loyihalariga jalb etishni nazarda tutuvchi yondashuv bayon etilgan.

Nashrda O'zbekiston milliy terma jamoasining 2026-yilgi futbol bo'yicha jahon chempionatiga tarixiy chiqishiga alohida e'tibor qaratilgan. Elchining so'zlariga ko'ra, sportdagi muvaffaqiyat nafaqat milliy g'urur manbai, balki mamlakatning xalqaro maydonda tanilishini oshirishning muhim omiliga aylandi. Turizm qo'mitasi ma'lumotlariga ko'ra, "Google"da mamlakatning JChdagi ishtiroki bilan bog'liq O'zbekistonga bo'lgan qiziqish va qidiruvlar 450 foizga oshgan, turizm doirasidagi turistik kampaniya esa 1,07 milliarddan ortiq media namoyishini ta'minlagan. "Biz uchun jahon chempionati shunchaki sport yutug'idan juda katta ahamiyatga ega bo'ldi. U odamlarni birlashtirdi va yangi do'stlik aloqalari uchun eshiklarni ochdi", - dedi Furqat Sidiqov.

Umuman olganda, ushbu intervyuning chop etilishi keng amerikalik ekspert-siyosiy auditoriyaga Yangi O'zbekiston yutuqlari va islohotlarning asosiy ustuvor yo'nalishlarini taqdim etish, erishilgan yuqori darajadagi strategik sheriklikni namoyish etish hamda mamlakatning mintaqaviy va xalqaro kun tartibidagi dolzarb masalalar bo'yicha pozitsiyasini yetkazish imkonini berdi.