OSLO, 13 dekabrь. /“Dunyo” AA/. O'zbekistonning Stokgolьm shahrida joylashgan elchixonasi diplomatlari Norvegiyada vaqtinchalik istiqomat qilayotgan bir guruh vatandoshlar bilan uchrashuv o'tkazdi, deb xabar qilmoqda “Dunyo” AA muxbiri.

Uchrashuvda mazkur mamlakatdagi o'zbek diasporasi bilan aloqalarni yanada rivojlantirish shuningdek, diasporamizning faol vakillari bilan eksport salohiyatini ilgari surish va mehnat migratsiyasini kengaytirish bo'yicha kelgusi hamkorlik imkoniyatlari muhokama qilindi.

Ochiq muloqot davomida hamyurtlarimiz tomonidan Norvegiyada, jumladan, “Vatandosh” jamg'armasini jalb qilgan holda, madaniy-ma'rifiy va turistik tadbirlarni birgalikda o'tkazish bo'yicha bir qator takliflar ilgari surildi.

Uchrashuv yakunida diplomatlarimiz tomonidan fuqarolarimizga sayyor konsullik-huquqiy xizmatlari ham ko'rsatildi.