KOPENGAGEN, 3-dekabr. /“Dunyo” AA/. O‘zbekiston diplomatlari Daniya poytaxtida istiqomat qilayotgan bir guruh vatandoshlarimiz bilan uchrashdi, deb xabar qilmoqda “Dunyo” AA muxbiri.

Muloqot davomida diplomatlarimiz O‘zbekiston fuqarolarining xorijdagi huquq va manfaatlarini himoya qilish bo‘yicha davlat siyosatining asosiy yo‘nalishlari, vatandoshlarni qo‘llab-quvvatlash bo‘yicha ko‘rilayotgan choralar hamda tashqi mehnat migratsiyasi sohasidagi islohotlar yuzasidan tushuntirishlar berdi. Shuningdek, fuqarolarimizga konsullik-huquqiy yordam ko‘rsatish masalalari ham muhokama qilindi.

BMT tashkilotlari tizimi xodimlari, moliya sektori, kreativ iqtisodiyot, axborot texnologiyalari, energetika, qishloq xo‘jaligi va boshqa turli kasbiy faoliyat sohalari vakili bo‘lgan vatandoshlarimiz yuqorida ko‘rsatilgan yo‘nalishlar bo‘yicha O‘zbekiston–Daniya hamkorligini faollashtirish yuzasidan o‘z takliflarini bildirdilar.

Shu bilan bir qatorda, Daniyada madaniy diplomatiya, turizm va O‘zbekiston brendini keng targ‘ib qilishda diasporaning faol ishtiroki bo‘yicha kelishib olindi.