QOHIRA, 5-yanvar. /“Dunyo” AA/. Xususiy sektorni rivojlantirish bo‘yicha Islom korporatsiyasi (ICD) O‘zbekistonda kichik va o‘rta biznesni qo‘llab-quvvatlash uchun “Anor bank”ga 10 million dollar miqdorida moliyalashtirish liniyasini taqdim etdi, deb xabar bermoqda “Dunyo” AA muxbiri.

Misrning “Sada al-Balad” nashrida eʼlon qilingan maqolada taʼkidlanishicha, ushbu kelishuv ICD “Anor bank”ni moliyalashtirgan birinchi ko‘p tomonlama rivojlanish banki sifatida ishtirok etgan birinchi bitim bo‘lib, mamlakatda xususiy sektor o‘sishini tezlashtirish uchun strategik asos yaratdi.

Bitim shartlariga ko‘ra, ajratilgan mablag‘lar kichik va o‘rta biznesni moliyalashtirishga, xususiy sektorning islomiy moliyaviy yechimlardan foydalanish imkoniyatlarini kengaytirishga yo‘naltiriladi. Bu “Anor bank”ning butun O‘zbekiston bo‘ylab barqaror iqtisodiy o‘sishni rag‘batlantirish bo‘yicha missiyasiga to‘liq mos keladi.

Ushbu moliyalashtirish mexanizmi “Anor Bank”ning strategik maqsadlarini amalga oshirishda muhim bosqich hisoblanadi. Xususan, u kichik va o‘rta biznesni rivojlantirishni kuchaytirish, xususiy sektorni moliyalashtirish hajmini kengaytirish, islom moliyasini targ‘ib qilish va O‘zbekiston iqtisodiyotini diversifikatsiya qilishga hissa qo‘shishga qaratilgan.

Ushbu tashabbus ICDning kichik va o‘rta biznes o‘sishini qo‘llab-quvvatlash va tashkilotga aʼzo mamlakatlarda barqaror iqtisodiy rivojlanishning asosiy omillari sifatida xususiy sektorni rivojlantirishga qaratilgan strategik mandatiga to‘liq mos keladi.

Kelishuv ICD ijrochi direktori vazifasini bajaruvchi doktor Xolid Xalafallax va “Anor Bank” boshqaruvi raisi Sherzod Akramov tomonidan imzolandi.