VASHINGTON, 17-mart. /“Dunyo” AA/. Dunyodagi eng nufuzli va mashhur iqtisodiy nashrlardan biri – Amerikaning “Forbes” jurnalida O‘zbekistondagi Islom sivilizatsiyasi markazi ochilishiga bag‘ishlangan maqola eʼlon qilindi, deb xabar bermoqda “Dunyo” AA muxbiri.

Jurnalda taʼkidlanishicha, geosiyosiy beqarorlik va iqtisodiy muammolar yuz berayotgan pallada O‘zbekiston o‘zining madaniy va strategik taʼsirini kuchaytirish orqali muhim qadam tashladi. Yangi barpo etilgan Islom sivilizatsiyasi markazi mamlakatning boy tarixiy merosi va butun Yevroosiyo bo‘ylab islomiy intellektual va madaniy anʼanalarni shakllantirishdagi rolini namoyish etadigan muhim loyihaga aylanmoqda.

“Forbes”ning yozishicha, shiddatli texnologik o‘zgarishlar va global keskinliklar davrida ushbu markaz musulmon dunyosida konstruktiv muloqot maydoni bo‘lib, Markaziy Osiyoning bag‘rikeng islom modelini ilgari surish uchun keng imkoniyat yaratmoqda.

Nashrning qayd etishicha, markaz nafaqat madaniy, balki strategik vazifani ham bajarayapti.

“Mamlakatning islom sivilizatsiyasi merosini targ‘ib qilish O‘zbekistonning Yevroosiyo markazini Yaqin Sharq va Janubiy Osiyo bilan bog‘laydigan madaniy va diplomatik ko‘prik sifatidagi rolini mustahkamlaydi, ko‘p mintaqaviy aloqalarga hissa qo‘shadi”, deya fikr yuritilgan maqolada.

Markaz madaniy vazifadan tashqari, radikallashuvga qarshi kurashish, inklyuziv islomni targ‘ib qilish, mintaqaviy barqarorlik va xalqaro tinchlik asosidagi meʼyorlarni targ‘ib qilish uchun faol platformaga aylanadi. Markaz tarixiy meros mamlakatning strategik taʼsirini kuchaytiruvchi vositaga aylanishi mumkinligini namoyish etmoqda.

Markazning ochilishi, O‘zbekistonning xalqaro maydonda AQSh va Yevroosiyodagi boshqa mamlakatlarning ishonchli hamkori sifatidagi roli ortib borayotganini taʼkidlaydi. Mamlakat o‘zining geografik markazlashuvi, demografik salohiyati va islohotlar kun tartibidan iqtisodiy ochiqlik, mintaqaviy xavfsizlik va madaniy yetakchilikni ilgari surish uchun foydalanmoqda.

“Forbes”da eʼlon qilgan maqola yakunida O‘zbekistondagi Islom sivilizatsiyasi markazi orqali tarixiy meros zamonaviy taʼsirga aylanayotgani taʼkidlangan. Markaz strategik diplomatiya, xalqaro xavfsizlik va farovonlikni mustahkamlash, murakkab global davrda hamkorlikning yangi ufqlarini ochishga xizmat qiladi.