DOHA, 9-aprel. /“Dunyo” AA/. Qatarning nufuzli “Gulf Times” gazetasida O‘zbekistonda barpo etilgan Islom sivilizatsiyasi markazi hamda Sohibqiron Amir Temurning ma’naviy merosiga bag‘ishlangan tahliliy maqola chop etildi, deb xabar bermoqda “Dunyo” AA muxbiri.

“Amir Temur merosi Islom sivilizatsiyasi markazida: Uchinchi Renessansning intellektual asosi” sarlavhali materialda Markazning nafaqat mintaqa, balki global islom sivilizatsiyasidagi o‘rni tahlil qilingan.

Maqolada asosiy urg‘u Sohibqiron Amir Temur shaxsiyatiga qaratilgan. Ta’kidlanishicha, Temuriylar davridagi ilm-fan, madaniyat va me’morchilik taraqqiyoti bugun O‘zbekistonda poydevori qo‘yilayotgan Uchinchi Renessans uchun asosiy ma’naviy manba bo‘lib xizmat qilmoqda.

"Bugun Toshkentda qad rostlagan Islom sivilizatsiyasi markazi — Amir Temur tomonidan asos solingan buyuk davlatchilik va ilm-fan an’analarining zamonaviy ko‘rinishidir. Markaz Sohibqironning 'Kuch — adolatdadir' degan tamoyilini intellektual salohiyat bilan boyitib, yangi davr poydevorini namoyon etmoqda",

– deb yozadi "Gulf Times".

Nashrning qayd etishicha, Markaz shunchaki muhtasham bino emas, balki buyuk sarkarda va davlat arbobi Amir Temur davridagi "oltin davr"ni bugungi innovatsiyalar bilan bog‘lovchi strategik maskandir.

"Gulf Times" tahliliga ko‘ra, Prezident Shavkat Mirziyoyev tashabbusi bilan bunyod etilgan ushbu majmua O‘zbekistonning jahon maydonidagi madaniy diplomatiyasini yangi darajaga olib chiqdi. Markazning ulkan gumbazi va har bir naqshi Amir Temur davri me’morchiligining zamonaviy talqini bo‘lib, u ilm va ma’rifatga intilgan ajdodlar ruhini aks ettiradi.