ISLOMOBOD, 5-oktabr. /“Dunyo” AA/. Pokistonning “Associated Press of Pakistan” axborot agentligida O‘zbekiston hamda Osiyoda hamkorlik va ishonch choralari bo‘yicha kengash (OHICHK)ga a’zo davlatlar o‘rtasidagi hamkorlikka bag‘ishlangan maqola e’lon qilindi, deb xabar bermoqda “Dunyo” AA muxbiri.

Maqolada yozilishicha, O‘zbekiston eksportini kengaytirish va sanoat kooperatsiyasini rivojlantirish ishonchli logistika, kapitalga kirish imkoniyati hamda xorijiy bozorlarda barqaror va prognoz qilinadigan shart-sharoitlarni talab etadi.

Ushbu vazifalar 28 davlatni birlashtirgan OHICHKning iqtisodiy kun tartibida muhim o‘rin tutadi. OHICHKning yettinchi sammiti Boku shahrida Ozarbayjon raisligi davrida bo‘lib o‘tishi rejalashtirilgan.

OHICHK ishtirokchilari orasida O‘zbekistonning asosiy savdo hamkorlari ham bor. 2026-yilning birinchi yarim yilligida Xitoy, Rossiya, Qozog‘iston, Turkiya va Afg‘oniston hissasiga respublika tashqi savdo aylanmasining jami qariyb 53 foizi to‘g‘ri keldi.

Turli bozorlar bilan ishlashda yetkazib berish yo‘nalishlarini ularning qiymati va muddatlarini hisobga olgan holda tanlash imkonini beruvchi, bir-birini to‘ldiradigan transport yo‘laklari tarmog‘i muhim ahamiyat kasb etadi.

Markaziy Osiyoning Janubiy va Sharqiy Osiyo hamda Yaqin Sharq bilan ishlab chiqarish-logistika aloqalarini rivojlantirish masalasi Prezident Shavkat Mirziyoyev tomonidan 2022-yilda Ostonada bo‘lib o‘tgan OHICHK sammitida iqtisodiy ustuvor yo‘nalishlardan biri sifatida qayd etilgan.

Agentlikda ta’kidlanishicha, qo‘shma loyihalarni tayyorlash moliyalashtirish manbalarini kelishishni ham talab qiladi. O‘zbekiston tomoni logistika, energetika va sanoat sohalaridagi tashabbuslarni salohiyatli investorlarga taqdim etish hamda ularni amalga oshirish shartlarini muhokama qilish imkoniyatiga ega bo‘ladi.